mujhe bhi soz-e-mohabbat ki dad mil jati

mujhe bhī soz-e-mohabbat kī daad mil jaatī

jo aap sāmne aa kar mujhe miTā dete

karam pe aap ko maa.il agar kabhī paate

adū ke naam se ham hāl-e-dil sunā dete

samajhtā maiñ ki ḳhalish kaam kar ga.ī dil kī

taḌaptā dekh ke mujh ko jo muskurā dete

mujhe sahāre kī tāqat to baḳhsh dete aap

nigāh-e-nāz se phir bijliyāñ girā dete

baḌī ummīdoñ se aa.e haiñ aap ke dar par

huzūr aaj to dast-e-karam baḌhā dete

ham un se mehr-o-vafā ke umīd-vār nahīñ

magar na dil se hameñ is tarah bhulā dete

ye musht-e-ḳhāk bhī gardan-farāz ho jaatī

ġharīb 'najma' ko qadmoñ meñ gar jagah dete

mujhe bhi soz-e-mohabbat ki dad mil jati

jo aap samne aa kar mujhe miTa dete

karam pe aap ko mail agar kabhi pate

adu ke nam se hum haal-e-dil suna dete

samajhta main ki KHalish kaam kar gai dil ki

taDapta dekh ke mujh ko jo muskura dete

mujhe sahaare ki taqat to baKHsh dete aap

nigah-e-naz se phir bijliyan gira dete

baDi ummidon se aae hain aap ke dar par

huzur aaj to dast-e-karam baDha dete

hum un se mehr-o-wafa ke umid-war nahin

magar na dil se hamein is tarah bhula dete

ye musht-e-KHak bhi gardan-faraaz ho jati

gharib 'najma' ko qadmon mein gar jagah dete