mujhe bhi ya-rab faraghat-e-mah-o-sal dena

mujhe bhī yā-rab farāġhat-e-māh-o-sāl denā

kabhī mire dil ke hausle bhī nikāl denā

ye ġham kī lambī añdherī shab kis tarah kaTegī

ufuq pe dil ke koī kiran to uchhāl denā

jo roz o shab ke nasīb meñ be-darī hai likhnī

na ḳhvāb denā na dil meñ shauq visāl denā

kabhī agar tum havāo dasht o jabal se guzro

to un kī mahrūmiyoñ ko merī misāl denā

ye zindagī kyā mire azā.em kā saath degī

mujhe kuchh is se bhī baḌh ke kār-e-muhāl denā

vo dil kī chāhat ḳhulūs kī bai.ateñ kahāñ haiñ

na.ī kahānī se sab ye bāteñ nikāl denā

mujhe bhi ya-rab faraghat-e-mah-o-sal dena

kabhi mere dil ke hausle bhi nikal dena

ye gham ki lambi andheri shab kis tarah kaTegi

ufuq pe dil ke koi kiran to uchhaal dena

jo roz o shab ke nasib mein be-dari hai likhni

na KHwab dena na dil mein shauq visal dena

kabhi agar tum hawao dasht o jabal se guzro

to un ki mahrumiyon ko meri misal dena

ye zindagi kya mere azaem ka sath degi

mujhe kuchh is se bhi baDh ke kar-e-muhaal dena

wo dil ki chahat KHulus ki baiaten kahan hain

nai kahani se sab ye baaten nikal dena