mujhe bhula ke mujhe yaad bhi rakha tu ne

mujhe bhulā ke mujhe yaad bhī rakhā tū ne

ye kaisā da.ava-e-dushvār phir kiyā tū ne

havā ne apne liye naam kuchh rakhe hoñge

thakan se pūchh liyā ghar kā rāstā tū ne

hazar ki ab mire hāthoñ meñ mudda'ā bhī nahīñ

kiyā hai laila-e-ḳhvāhish ko be-adā tū ne

ye kaun terī tarah merī aañkh meñ chamkā

jalā.ī kaisī ye qindīl-e-bad-duā tū ne

nigāh-e-shab tire āñgan meñ ḳhvāb DhūñDhe thī

ye ab ke zaḳhm bhī kaisā diyā nayā tū ne

tujhe mire liye nīñdoñ ke phuul laane the

ye kaisā āñkhoñ ko baḳhshā hai ratjagā tū ne

libās badlī huī raunaqoñ ke achchhe the

magar ye dil ki rakhā hausla-qabā tū ne

qadam ukhaḌ se ga.e the bajā.e ham-safarī

havā ko oḌh ke dekhā thā bār-hā tū ne

rahī gurez kī tah-dāmanī se bargashta

mujhe diyā thā vo saudā-e-hausla tū ne

mujhe bhula ke mujhe yaad bhi rakha tu ne

ye kaisa dawa-e-dushwar phir kiya tu ne

hawa ne apne liye nam kuchh rakhe honge

thakan se puchh liya ghar ka rasta tu ne

hazar ki ab mere hathon mein mudda'a bhi nahin

kiya hai laila-e-KHwahish ko be-ada tu ne

ye kaun teri tarah meri aankh mein chamka

jalai kaisi ye qindil-e-bad-dua tu ne

nigah-e-shab tere aangan mein KHwab DhunDhe thi

ye ab ke zaKHm bhi kaisa diya naya tu ne

tujhe mere liye nindon ke phul lane the

ye kaisa aankhon ko baKHsha hai ratjaga tu ne

libas badli hui raunaqon ke achchhe the

magar ye dil ki rakha hausla-qaba tu ne

qadam ukhaD se gae the bajae ham-safari

hawa ko oDh ke dekha tha bar-ha tu ne

rahi gurez ki tah-damani se bargashta

mujhe diya tha wo sauda-e-hausla tu ne