mujhe dariya ki maujon se bacha le jaega koi

mujhe dariyā kī maujoñ se bachā le jā.egā koī

maiñ aisī buuñd huuñ jis ko churā le jā.egā koī

bujhā kar taaq meñ rakh degā ye dast-e-sahar mujh ko

magar jab shaam aa.egī jalā le jā.egā koī

yahī kuchh soch kar apnī havelī chhoḌ aayā thā

agar maiñ ruuTh jā.ūñgā manā le jā.egā koī

ra.īsoñ kī ye bastī hai khaḌe haiñ raah meñ saa.il

kahegā haath meñ sikka duā le jā.egā koī

mujhe achchhā nahīñ lagtā kisī se maañg kar paḌhnā

kitābeñ maiñ ḳharīdūñgā uThā le jā.egā koī

churā laa.ī hai phūloñ se mujhe bād-e-sabā 'ḳhālid'

maiñ ḳhushbū huuñ mujhe apnā banā le jā.egā koī

mujhe dariya ki maujon se bacha le jaega koi

main aisi bund hun jis ko chura le jaega koi

bujha kar taq mein rakh dega ye dast-e-sahar mujh ko

magar jab sham aaegi jala le jaega koi

yahi kuchh soch kar apni haweli chhoD aaya tha

agar main ruTh jaunga mana le jaega koi

raison ki ye basti hai khaDe hain rah mein sail

kahega hath mein sikka dua le jaega koi

mujhe achchha nahin lagta kisi se mang kar paDhna

kitaben main KHaridunga uTha le jaega koi

chura lai hai phulon se mujhe baad-e-saba 'KHalid'

main KHushbu hun mujhe apna bana le jaega koi