mujhe hasil kamal-e-guftugu hai

mujhe hāsil kamāl-e-guftugū hai

ye maiñ huuñ yā mire lahje meñ tū hai

junūn-e-ābla-pā.ī Thahar jā

abhī barham mizāj-e-justujū hai

kisī din to had-e-imkāñ meñ hogā

tasavvur meñ jo shahr-e-ārzū hai

asar-andāz hogā zehn-o-dil par

jo sannāTā fazā meñ chār-sū hai

zabāñ par hī nahīñ harf-e-tamannā

mirā dil bhī sharīk-e-guftugū hai

har ik chehra tar-o-tāza milegā

jahāñ tak bhī hisār-e-rang-o-bū hai

muhāfiz hai mirī achchhā.iyoñ kā

vo ā.īna jo mere rū-ba-rū hai

mujhe hasil kamal-e-guftugu hai

ye main hun ya mere lahje mein tu hai

junun-e-abla-pai Thahar ja

abhi barham mizaj-e-justuju hai

kisi din to had-e-imkan mein hoga

tasawwur mein jo shahr-e-arzu hai

asar-andaz hoga zehn-o-dil par

jo sannaTa faza mein chaar-su hai

zaban par hi nahin harf-e-tamanna

mera dil bhi sharik-e-guftugu hai

har ek chehra tar-o-taza milega

jahan tak bhi hisar-e-rang-o-bu hai

muhafiz hai meri achchhaiyon ka

wo aaina jo mere ru-ba-ru hai