mujhe kal achanak KHayal aa gaya aasman kho na jae

mujhe kal achānak ḳhayāl aa gayā āsmāñ kho na jaa.e

samundar ko sar karte karte kahīñ bādbāñ kho na jaa.e

koī nā-murādī kī yalġhār siine ko chhalnī na kar de

kahīñ dasht-e-anfās meñ sabr kā kārvāñ kho na jaa.e

ye hañstā huā shor sanjīdgī ke liye imtihāñ hai

so mohtāt rahnā ki tahzīb-e-āh-o-fuġhāñ kho na jaa.e

ise vaqt kā jabr kahiye ki bechārgī jism o jaañ kī

makāñ khone vāloñ ko Dar hai ki ab lā-makāñ kho na jaa.e

maiñ apne irādoñ kī gaThrī uThā.e kahīñ jā na paayā

hamesha ye dhaḌkā rahā mahfil-e-dostāñ kho na jaa.e

ye qissoñ kī rim-jhim meñ bhīgā huā halqa-e-guftugū hai

yahāñ chup hī rahnā ki tāsīr-e-lafz-o-bayāñ kho na jaa.e

yahāñ kis ko fursat ki āġhāz o anjām ko yaad rakkhe

sabhī ko ye tashvīsh hai vaqt kā darmiyāñ kho na jaa.e

ye bāzār-e-naf.a-o-zarar hai yahāñ be-tavāzun na honā

sameTo agar suud to dhyān rakhnā ziyāñ kho na jaa.e

uTho 'azm' is ātish-e-shauq ko sard hone se roko

agar ruk na paa.e to koshish ye karnā dhuāñ kho na jaa.e

mujhe kal achanak KHayal aa gaya aasman kho na jae

samundar ko sar karte karte kahin baadban kho na jae

koi na-muradi ki yalghaar sine ko chhalni na kar de

kahin dasht-e-anfas mein sabr ka karwan kho na jae

ye hansta hua shor sanjidgi ke liye imtihan hai

so mohtat rahna ki tahzib-e-ah-o-fughan kho na jae

ise waqt ka jabr kahiye ki bechaargi jism o jaan ki

makan khone walon ko Dar hai ki ab la-makan kho na jae

main apne iradon ki gaThri uThae kahin ja na paya

hamesha ye dhaDka raha mahfil-e-dostan kho na jae

ye qisson ki rim-jhim mein bhiga hua halqa-e-guftugu hai

yahan chup hi rahna ki tasir-e-lafz-o-bayan kho na jae

yahan kis ko fursat ki aaghaz o anjam ko yaad rakkhe

sabhi ko ye tashwish hai waqt ka darmiyan kho na jae

ye bazar-e-nafa-o-zarar hai yahan be-tawazun na hona

sameTo agar sud to dhyan rakhna ziyan kho na jae

uTho 'azm' is aatish-e-shauq ko sard hone se roko

agar ruk na pae to koshish ye karna dhuan kho na jae