mujhe kisi ne bataya KHuda hai mere sath

mujhe kisī ne batāyā ḳhudā hai mere saath

maiñ kyā batā.ūñ use aur kyā hai mere saath

tujhe yaqīñ nahīñ aa.egā par haqīqat hai

ye tū nahīñ hai koī dūsrā hai mere saath

ye mushkilāt bhī ab mere saath rahtī haiñ

ye jāntī haiñ ki mushkil-kushā hai mere saath

maiñ kyā batā.ūñ tujhe yaad kyā dilā.ūñ tujhe

tū jāntā hai jo tū ne kiyā hai mere saath

agar vafā ko batā.ūñ vafā bhī chīḳh paḌe

vafā ke naam pe jo kuchh huā hai mere saath

sitam to ye hai ki maiñ ne use bhī chhoḌ diyā

jo sab ko chhoḌ ke tanhā khaḌā hai mere saath

kisī se koī shikāyat nahīñ mujhe 'momin'

jo honā chāhiye vo ho rahā hai mere saath

mujhe kisi ne bataya KHuda hai mere sath

main kya bataun use aur kya hai mere sath

tujhe yaqin nahin aaega par haqiqat hai

ye tu nahin hai koi dusra hai mere sath

ye mushkilat bhi ab mere sath rahti hain

ye jaanti hain ki mushkil-kusha hai mere sath

main kya bataun tujhe yaad kya dilaun tujhe

tu jaanta hai jo tu ne kiya hai mere sath

agar wafa ko bataun wafa bhi chiKH paDe

wafa ke nam pe jo kuchh hua hai mere sath

sitam to ye hai ki main ne use bhi chhoD diya

jo sab ko chhoD ke tanha khaDa hai mere sath

kisi se koi shikayat nahin mujhe 'momin'

jo hona chahiye wo ho raha hai mere sath