mujhe yaqin dila haalat-e-guman se nikal

mujhe yaqīn dilā hālat-e-gumāñ se nikāl

ġham-e-hayāt ko baḌhte hue ziyāñ se nikāl

phir is ke ba.ad jahāñ tū kahe guzārūñgā

bas ek baar zarā karb-e-jism-o-jāñ se nikāl

maiñ ain apne hadaf par lagūñgā, shart lagā

zarā sā khīñch mujhe aur phir kamāñ se nikāl

maiñ apne jism ke andar na dafn ho jā.ūñ

mujhe vajūd ke girte hue makāñ se nikāl

maiñ ek sho.ala-e-badmast hī sahī lekin

maiñ jal rahā huuñ mujhe mere darmiyāñ se nikāl

ai Dāliyoñ pe na.e phal ugāne vaalī duā

mire shajar ko bhī is hālat-e-ḳhizāñ se nikāl

bulā rahī hai tujhe bhī havas kī shahzādī

tū apne aap ko is lamha-e-ravāñ se nikāl

jise bahisht meñ aadam ne chakh liyā thā 'atīb'

maiñ khā rahā huuñ vahī phal, mujhe yahāñ se nikāl

mujhe yaqin dila haalat-e-guman se nikal

gham-e-hayat ko baDhte hue ziyan se nikal

phir is ke baad jahan tu kahe guzarunga

bas ek bar zara karb-e-jism-o-jaan se nikal

main ain apne hadaf par lagunga, shart laga

zara sa khinch mujhe aur phir kaman se nikal

main apne jism ke andar na dafn ho jaun

mujhe wajud ke girte hue makan se nikal

main ek shoala-e-badmast hi sahi lekin

main jal raha hun mujhe mere darmiyan se nikal

ai Daliyon pe nae phal ugane wali dua

mere shajar ko bhi is haalat-e-KHizan se nikal

bula rahi hai tujhe bhi hawas ki shahzadi

tu apne aap ko is lamha-e-rawan se nikal

jise bahisht mein aadam ne chakh liya tha 'atib'

main kha raha hun wahi phal, mujhe yahan se nikal