mujhe zindagi se KHiraj hi nahin mil raha

mujhe zindagī se ḳhirāj hī nahīñ mil rahā

abhī us se merā mizāj hī nahīñ mil rahā

maiñ banā rahā huuñ ḳhayāl-o-ḳhvāb kī bandisheñ

mirī bandishoñ ko rivāj hī nahīñ mil rahā

mujhe saltanat to milī huī hai jamāl kī

kisī ishq kā koī taaj hī nahīñ mil rahā

mujhe milne aa.egā shaam ko mirā ham-suḳhan

mirā ā.īna mujhe aaj hī nahīñ mil rahā

mire chārāgar ko paḌī huī hai ilaaj kī

mujhe is kā koī ilaaj hī nahīñ mil rahā

mile kārvāñ ye bahut hī duur kī baat hai

abhī kārvāñ kā mizāj hī nahīñ mil rahā

abhī phir rahā huuñ maiñ āp-apnī talāsh meñ

abhī mujh se merā mizāj hī nahīñ mil rahā

mujhe zindagi se KHiraj hi nahin mil raha

abhi us se mera mizaj hi nahin mil raha

main bana raha hun KHayal-o-KHwab ki bandishen

meri bandishon ko riwaj hi nahin mil raha

mujhe saltanat to mili hui hai jamal ki

kisi ishq ka koi taj hi nahin mil raha

mujhe milne aaega sham ko mera ham-suKHan

mera aaina mujhe aaj hi nahin mil raha

mere chaaragar ko paDi hui hai ilaj ki

mujhe is ka koi ilaj hi nahin mil raha

mile karwan ye bahut hi dur ki baat hai

abhi karwan ka mizaj hi nahin mil raha

abhi phir raha hun main aap-apni talash mein

abhi mujh se mera mizaj hi nahin mil raha