mujhi se puchh raha tha mera pata koi

mujhī se pūchh rahā thā mirā patā koī

butoñ ke shahr meñ maujūd thā ḳhudā koī

ḳhamoshiyoñ kī chaTānoñ ko toḌne ke liye

kisī ke paas nahīñ tīsha-e-sadā koī

daraḳht haath uThā kar salām karte the

mire junūñ kā mubārak thā marhala koī

samajh sakā na magar koī pattharoñ kī zabāñ

har ek lamha lagā boltā huā koī

ye band lab haiñ ki koī khulī huī sī kitāb

mire savāl pe is dam to boltā koī

varaq pe raat ke likkhī hai sub.h kī tahrīr

ye ek vaqt hai be-rañg-o-nūr sā koī

na harf harf huā aks-e-guftugū merā

samajhnā chāho to le aao aa.ina koī

ik āñsuoñ kā samundar thā jal-parī kā libās

milā to aise milā paikar-e-vafā koī

har ek zehn meñ apne hī band hai 'mājid'

fazā ke ḳhol se bāhar hai rāsta koī

mujhi se puchh raha tha mera pata koi

buton ke shahr mein maujud tha KHuda koi

KHamoshiyon ki chaTanon ko toDne ke liye

kisi ke pas nahin tisha-e-sada koi

daraKHt hath uTha kar salam karte the

mere junun ka mubarak tha marhala koi

samajh saka na magar koi pattharon ki zaban

har ek lamha laga bolta hua koi

ye band lab hain ki koi khuli hui si kitab

mere sawal pe is dam to bolta koi

waraq pe raat ke likkhi hai subh ki tahrir

ye ek waqt hai be-rang-o-nur sa koi

na harf harf hua aks-e-guftugu mera

samajhna chaho to le aao aaina koi

ek aansuon ka samundar tha jal-pari ka libas

mila to aise mila paikar-e-wafa koi

har ek zehn mein apne hi band hai 'majid'

faza ke KHol se bahar hai rasta koi