main kaha ek ada kar to laga kahne un-hun

maiñ kahā ek adā kar to lagā kahne ''ūñ-hūñ''

dekh Tuk aañkh churā kar to lagā kahne ''ūñ-hūñ''

sab se hañstā thā vo kal, ro ke jo maiñ bol uThā

ham se bhī Tuk tū hañsā kar to lagā kahne ''ūñ-hūñ''

maiñ kahā dil ko maiñ le jā.ūñ to bolā vo ki ''hūñ''

le chalā jab maiñ uThā kar to lagā kahne ''ūñ-hūñ''

maiñ kahā sabr o dil o diiñ ne vafā ham se na kī

be-vafā tū to vafā kar to lagā kahne ''ūñ-hūñ''

maiñ kahā jām-e-mai piite ho to bolā vo ki ''hūñ''

jab kahā lā.ūñ chhupā kar to lagā kahne ''ūñ-hūñ''

maiñ kahā sohbat-e-aġhyār barī hai pyāre

un se itnā na milā kar to lagā kahne ''ūñ-hūñ''

maiñ kahā ishq ko iz.hār karūñ bolā ''hūñ''

jab kahā kahtā huuñ jā kar to lagā kahne ''ūñ-hūñ''

maiñ kahā samjhe hai āzār mirā bolā ''hūñ''

jab kahā kuchh to davā kar to lagā kahne ''ūñ-hūñ''

maiñ kahā ab tirī duurī se hai 'jur.at' be-tāb

kuchh to kah paas balā kar to lagā kahne ''ūñ-hūñ''

main kaha ek ada kar to laga kahne un-hun

dekh Tuk aankh chura kar to laga kahne un-hun

sab se hansta tha wo kal, ro ke jo main bol uTha

hum se bhi Tuk tu hansa kar to laga kahne un-hun

main kaha dil ko main le jaun to bola wo ki hun

le chala jab main uTha kar to laga kahne un-hun

main kaha sabr o dil o din ne wafa hum se na ki

be-wafa tu to wafa kar to laga kahne un-hun

main kaha jam-e-mai pite ho to bola wo ki hun

jab kaha laun chhupa kar to laga kahne un-hun

main kaha sohbat-e-aghyar bari hai pyare

un se itna na mila kar to laga kahne un-hun

main kaha ishq ko izhaar karun bola hun

jab kaha kahta hun ja kar to laga kahne un-hun

main kaha samjhe hai aazar mera bola hun

jab kaha kuchh to dawa kar to laga kahne un-hun

main kaha ab teri duri se hai 'jurat' be-tab

kuchh to kah pas bala kar to laga kahne un-hun