muKHtalif hain meri bahaar ke rang

muḳhtalif haiñ mirī bahār ke rañg

kuchh mire apne kuchh udhār ke rañg

aaj yaksar bahār le aa.ī

mere dil kī galī meñ pyaar ke rañg

terī āñkhoñ se milte-julte haiñ

merī āñkhoñ ke ābshār ke rañg

dil kī chaukhaT sajā.e baiThe haiñ

aaj bhī tere intizār ke rañg

raat mil kar gale bahut ro.e

terī yādoñ se mere pyaar ke rañg

vaqt kī dhuup kā qusūr nahīñ

the hī kachche vo e'tibār ke rañg

thak ga.e par mahak na lā paa.e

kāġhzī phuul par bahār ke rañg

dhuup ruḳh par paḌī havas kī 'sahar'

uḌ ga.e ishq ke ḳhumār ke rañg

muKHtalif hain meri bahaar ke rang

kuchh mere apne kuchh udhaar ke rang

aaj yaksar bahaar le aai

mere dil ki gali mein pyar ke rang

teri aankhon se milte-julte hain

meri aankhon ke aabshaar ke rang

dil ki chaukhaT sajae baiThe hain

aaj bhi tere intizar ke rang

raat mil kar gale bahut roe

teri yaadon se mere pyar ke rang

waqt ki dhup ka qusur nahin

the hi kachche wo e'tibar ke rang

thak gae par mahak na la pae

kaghzi phul par bahaar ke rang

dhup ruKH par paDi hawas ki 'sahar'

uD gae ishq ke KHumar ke rang