mumkin jahan nahin thi wahan kaT di gai

mumkin jahāñ nahīñ thī vahāñ kaaT dī ga.ī

kuchh din kī zindagī thī miyāñ kaaT dī ga.ī

muflis jo the vo pyaas kī shiddat se mar ga.e

mahloñ kī samt jū-e-ravāñ kaaT dī ga.ī

maiñ ne buland kī thī sadā ehtijāj kī

phir yuuñ huā ki merī zabāñ kaaT dī ga.ī

terī zamīñ pe saañs bhī lenā muhāl thā

majbūr ho ke ziist yahāñ kaaT dī ga.ī

merī sazā-e-maut pe ik jashn thā bapā

vo shor thā ki merī fuġhāñ kaaT dī ga.ī

dast-e-hunar pe nok-e-sināñ par ġhurūr hai

lekin jarī jo nok-e-sināñ kaaT dī ga.ī

pahle to baat baat pe Tokā gayā mujhe

phir tañg aa ke merī inaañ kaaT dī ga.ī

'nāsir' hai rāh-e-shauq meñ 'momin' kā mo'taqid

umr-e-ravāñ dar ishq-e-butāñ kaaT dī ga.ī

mumkin jahan nahin thi wahan kaT di gai

kuchh din ki zindagi thi miyan kaT di gai

muflis jo the wo pyas ki shiddat se mar gae

mahlon ki samt ju-e-rawan kaT di gai

main ne buland ki thi sada ehtijaj ki

phir yun hua ki meri zaban kaT di gai

teri zamin pe sans bhi lena muhaal tha

majbur ho ke zist yahan kaT di gai

meri saza-e-maut pe ek jashn tha bapa

wo shor tha ki meri fughan kaT di gai

dast-e-hunar pe nok-e-sinan par ghurur hai

lekin jari jo nok-e-sinan kaT di gai

pahle to baat baat pe Toka gaya mujhe

phir tang aa ke meri inan kaT di gai

'nasir' hai rah-e-shauq mein 'momin' ka mo'taqid

umr-e-rawan dar ishq-e-butan kaT di gai