munawwar jism-o-jaan hone lage hain

munavvar jism-o-jāñ hone lage haiñ

ki ham ḳhud par ayaañ hone lage haiñ

ba-zāhir to dikhā.ī de rahe haiñ

ba-bātin ham dhuāñ hone lage haiñ

jinheñ tārīḳh bhī likhte Daregī

vo hañgāme yahāñ hone lage haiñ

bahut se log kyuuñ jaane achānak

tabī.at par girāñ hone lage haiñ

fazā meñ murta.ish bhī be-asar bhī

ham āvāz-e-azāñ hone lage haiñ

siyāsī log ab chole badal kar

ḳhudā ke tarjumāñ hone lage haiñ

jo ham ko jaañ se baḌh kar chāhte the

nasīb-e-dushmanāñ hone lage haiñ

vo chiñgārī jo ain-e-mudda.ā hai

to ham shola-ba-jāñ hone lage haiñ

kabhī the nafā apnā aap ham bhī

magar ab to ziyāñ hone lage haiñ

azīyat-koshiyoñ kā faiz dekho

masā.il dāstāñ hone lage haiñ

bayāñ ham ko karegā vo kahāñ se

ki ham to ḳhud bayāñ hone lage haiñ

zarā aape meñ rakkho ḳhud ko 'akmal'

ki bachche ab javāñ hone lage haiñ

munawwar jism-o-jaan hone lage hain

ki hum KHud par ayan hone lage hain

ba-zahir to dikhai de rahe hain

ba-baatin hum dhuan hone lage hain

jinhen tariKH bhi likhte Daregi

wo hangame yahan hone lage hain

bahut se log kyun jaane achanak

tabiat par giran hone lage hain

faza mein murtaish bhi be-asar bhi

hum aawaz-e-azan hone lage hain

siyasi log ab chole badal kar

KHuda ke tarjuman hone lage hain

jo hum ko jaan se baDh kar chahte the

nasib-e-dushmanan hone lage hain

wo chingari jo ain-e-muddaa hai

to hum shola-ba-jaan hone lage hain

kabhi the nafa apna aap hum bhi

magar ab to ziyan hone lage hain

aziyat-koshiyon ka faiz dekho

masail dastan hone lage hain

bayan hum ko karega wo kahan se

ki hum to KHud bayan hone lage hain

zara aape mein rakkho KHud ko 'akmal'

ki bachche ab jawan hone lage hain