munh andhere teri yaadon se nikalna hai mujhe

muñh añdhere terī yādoñ se nikalnā hai mujhe

aur phir maazī kā pairāhan badalnā hai mujhe

parbatoñ par sub.h kī sī dhuup huuñ maiñ in dinoñ

jāntā huuñ ab Dhalānoñ par phisalnā hai mujhe

vaar se bachnā to hai hī vaar ik karnā bhī hai

aur in ke biich hī ruk kar sañbhalnā hai mujhe

mujh pe hī aa kar Tikīñ bedār āñkheñ is liye

ban ke jugnū aas kā har raat jalnā hai mujhe

ai mirī masrūfiyat mujh ko zarūrat hai tirī

ik purāne ġham kā sar phir se kuchalnā hai mujhe

ik udāsī kā samundar hai mire andar kahīñ

haañ usī meñ shaam ke sūraj sā Dhalnā hai mujhe

maiñ kisī muflis kā jī huuñ yuuñ nahīñ to yuuñ sahī

bas zarā sī baat se hī to bahalnā hai mujhe

maiñ koī but to nahīñ 'ātish' mulā.im barf kā

aañch se ik din magar apnī pighalnā hai mujhe

munh andhere teri yaadon se nikalna hai mujhe

aur phir mazi ka pairahan badalna hai mujhe

parbaton par subh ki si dhup hun main in dinon

jaanta hun ab Dhalanon par phisalna hai mujhe

war se bachna to hai hi war ek karna bhi hai

aur in ke bich hi ruk kar sanbhalna hai mujhe

mujh pe hi aa kar Tikin bedar aankhen is liye

ban ke jugnu aas ka har raat jalna hai mujhe

ai meri masrufiyat mujh ko zarurat hai teri

ek purane gham ka sar phir se kuchalna hai mujhe

ek udasi ka samundar hai mere andar kahin

han usi mein sham ke suraj sa Dhalna hai mujhe

main kisi muflis ka ji hun yun nahin to yun sahi

bas zara si baat se hi to bahalna hai mujhe

main koi but to nahin 'atish' mulaim barf ka

aanch se ek din magar apni pighalna hai mujhe