munh chhupae hue bhaTkegi hawa mere baad

muñh chhupā.e hue bhaTkegī havā mere baad

saaz ho jā.egī sahrā kī sadā mere baad

saaf aate haiñ nazar jis meñ sabhī ke chehre

aa.ine par na rahegī vo jilā mere baad

be-libāsī hī muqaddar thā magar ham-nafaso

tan chhupāne ko milī tum ko ridā mere baad

mere alfāz ko ta.avīz banā kar rakh lo

varna uTh jā.egī duniyā se vafā mere baad

'sāqī' is aas pe kuchh kahne kī himmat kī hai

kaash dohrā.e koī merā kahā mere baad

munh chhupae hue bhaTkegi hawa mere baad

saz ho jaegi sahra ki sada mere baad

saf aate hain nazar jis mein sabhi ke chehre

aaine par na rahegi wo jila mere baad

be-libasi hi muqaddar tha magar ham-nafaso

tan chhupane ko mili tum ko rida mere baad

mere alfaz ko tawiz bana kar rakh lo

warna uTh jaegi duniya se wafa mere baad

'saqi' is aas pe kuchh kahne ki himmat ki hai

kash dohrae koi mera kaha mere baad