muqabil be-murawwat aaina hone nahin deta

muqābil be-muravvat aa.ina hone nahīñ detā

koī ab ḳhud se apnā sāmnā hone nahīñ detā

bahut jhuk jhuk ke chaltā huuñ maiñ in baunoñ kī bastī meñ

ye chhoTā-pan kabhī mujh ko baḌā hone nahīñ detā

kashākash ye ajab ik ishq kī jaarī hai sadiyoñ se

fidā hotā huuñ maiñ aur vo fanā hone nahīñ detā

vahī jaane kahāñ pahuñchā.egā apne asīroñ ko

patā detā nahīñ aur lāpata hone nahīñ detā

yahī kah kar mohabbat kījiye to be-ġharaz kiije

vo ḳhud ko merī chāhat kā sila hone nahīñ detā

bahut parhez hai us ko mirā bīmār ho kar bhī

kisī sūrat mujhe apnī davā hone nahīñ detā

vo rakhtā hai mujhe is tarah apnī chust bandish meñ

kabhī mujh ko shikast-e-nā-ravā hone nahīñ detā

maiñ kab tak bakriyoñ ke vāste patte girā.uñgā

mirī lāThī ko vo ab azhdahā hone nahīñ detā

ḳhushī aur nā-ḳhushī par ab nahīñ kuchh iḳhtiyār apnā

ḳhafā kartā hai mujh ko aur ḳhafā hone nahīñ detā

hazāroñ masnadeñ ḳhālī paḌī haiñ aaj bhī lekin

judā mujh ko ye merā boriyā hone nahiñ detā

muqabil be-murawwat aaina hone nahin deta

koi ab KHud se apna samna hone nahin deta

bahut jhuk jhuk ke chalta hun main in baunon ki basti mein

ye chhoTa-pan kabhi mujh ko baDa hone nahin deta

kashakash ye ajab ek ishq ki jari hai sadiyon se

fida hota hun main aur wo fana hone nahin deta

wahi jaane kahan pahunchaega apne asiron ko

pata deta nahin aur lapata hone nahin deta

yahi kah kar mohabbat kijiye to be-gharaz kije

wo KHud ko meri chahat ka sila hone nahin deta

bahut parhez hai us ko mera bimar ho kar bhi

kisi surat mujhe apni dawa hone nahin deta

wo rakhta hai mujhe is tarah apni chust bandish mein

kabhi mujh ko shikast-e-na-rawa hone nahin deta

main kab tak bakriyon ke waste patte giraunga

meri laThi ko wo ab azhdaha hone nahin deta

KHushi aur na-KHushi par ab nahin kuchh iKHtiyar apna

KHafa karta hai mujh ko aur KHafa hone nahin deta

hazaron masnaden KHali paDi hain aaj bhi lekin

juda mujh ko ye mera boriya hone nahin deta