muqabil hai jo mere aks ke us aaine mein hun

muqābil hai jo mire aks ke us aa.ine meñ huuñ

maiñ ḳhud par munkashif hone ke nāzuk marhale meñ huuñ

ḳhudī ke moḌ par huuñ aap hī maiñ muntazir apnī

ta.āruf kī na.ī manzil ke pahle rāste meñ huuñ

kashish terī sahī gardish mirī apnī hai ai mehvar

tire hī gard huuñ lekin maiñ apne dā.ere meñ huuñ

abhī is raushnī kī asliyat kā raaz mat kholo

abhī maiñ chāñdnī ke pur-fusūñ hairat-kade meñ huuñ

tasalsul saath hai mere mujhe tabdīl karne kā

azal se jārī-o-sārī fanā ke silsile meñ huuñ

safar meñ chal rahā hai ḳhauf sā aapas meñ luTne kā

ye kaisī raah par huuñ maiñ ye kaise qāfile meñ huuñ

abhī tark-e-ta.alluq ke kisī barzaḳh meñ hai vo bhī

abhī mahfūz hai jo maiñ bhī aise faisle meñ huuñ

havā ne yuuñ tasallī dī hai aksar ret nagrī ko

idhar ā.eñge āḳhir bādaloñ se rābte meñ huuñ

zamīnī mushkiloñ ke hal kī fursat hī kahāñ mujh ko

bahut uljhī huī ik āsmānī mas.ale meñ huuñ

muqabil hai jo mere aks ke us aaine mein hun

main KHud par munkashif hone ke nazuk marhale mein hun

KHudi ke moD par hun aap hi main muntazir apni

taaruf ki nai manzil ke pahle raste mein hun

kashish teri sahi gardish meri apni hai ai mehwar

tere hi gard hun lekin main apne daere mein hun

abhi is raushni ki asliyat ka raaz mat kholo

abhi main chandni ke pur-fusun hairat-kade mein hun

tasalsul sath hai mere mujhe tabdil karne ka

azal se jari-o-sari fana ke silsile mein hun

safar mein chal raha hai KHauf sa aapas mein luTne ka

ye kaisi rah par hun main ye kaise qafile mein hun

abhi tark-e-talluq ke kisi barzaKH mein hai wo bhi

abhi mahfuz hai jo main bhi aise faisle mein hun

hawa ne yun tasalli di hai aksar ret nagri ko

idhar aaenge aaKHir baadalon se rabte mein hun

zamini mushkilon ke hal ki fursat hi kahan mujh ko

bahut uljhi hui ek aasmani masale mein hun