muqaddar meñ sāhil kahāñ hai miyāñ
mirī naav be-bādbāñ hai miyāñ
jo barq-e-tapāñ se munavvar rahe
vahī āshiyāñ āshiyāñ hai miyāñ
kahāñ jā.iye mai-kada chhoḌ kar
yahī ek jā-e-amāñ hai miyāñ
abad tak mukammal na ho pā.egī
shab-e-ġham kī ye dāstāñ hai miyāñ
kahāñ paaoñ rakkhūñ pareshān huuñ
zamīñ sūrat-e-āsmāñ hai miyāñ
muqaddas sahī kārobār-e-vafā
magar is meñ nuqsān-e-jāñ hai miyāñ
ajab phīkī phīkī sī hai chāñdnī
udaas aaj kyuuñ chandramāñ hai miyāñ
jahāñ dil ke badle meñ miltā hai dil
vo duniyā na jaane kahāñ hai miyāñ
nahīñ mujh se 'ābid' vo kuchh ḳhaas duur
faqat zindagī darmiyāñ hai miyāñ
muqaddar mein sahil kahan hai miyan
meri naw be-baadban hai miyan
jo barq-e-tapan se munawwar rahe
wahi aashiyan aashiyan hai miyan
kahan jaiye mai-kada chhoD kar
yahi ek ja-e-aman hai miyan
abad tak mukammal na ho paegi
shab-e-gham ki ye dastan hai miyan
kahan paon rakkhun pareshan hun
zamin surat-e-asman hai miyan
muqaddas sahi karobar-e-wafa
magar is mein nuqsan-e-jaan hai miyan
ajab phiki phiki si hai chandni
udas aaj kyun chandraman hai miyan
jahan dil ke badle mein milta hai dil
wo duniya na jaane kahan hai miyan
nahin mujh se 'abid' wo kuchh KHas dur
faqat zindagi darmiyan hai miyan
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
