murawwaton pe wafa ka guman bhi rakhta tha

muravvatoñ pe vafā kā gumāñ bhī rakhtā thā

vo aadmī thā ġhalat-fahmiyāñ bhī rakhtā thā

bahut dinoñ meñ ye bādal idhar se guzrā hai

mirā makān kabhī sā.ebāñ bhī rakhtā thā

ajiib shaḳhs thā bachtā bhī thā havādis se

phir apne jism pe ilzām-e-jāñ bhī rakhtā thā

Dubo diyā hai to ab is kā kyā gila kiije

yahī bahāo safīne ravāñ bhī rakhtā thā

tū ye na dekh ki sab Tahniyāñ salāmat haiñ

ki ye daraḳht thā aur pattiyāñ bhī rakhtā thā

har ek zarra thā gardish meñ āsmāñ kī tarah

maiñ apnā paañv zamīñ par jahāñ bhī rakhtā thā

lipaT bhī jaatā thā aksar vo mere siine se

aur ek fāsla sā darmiyāñ bhī rakhtā thā

murawwaton pe wafa ka guman bhi rakhta tha

wo aadmi tha ghalat-fahmiyan bhi rakhta tha

bahut dinon mein ye baadal idhar se guzra hai

mera makan kabhi saeban bhi rakhta tha

ajib shaKHs tha bachta bhi tha hawadis se

phir apne jism pe ilzam-e-jaan bhi rakhta tha

Dubo diya hai to ab is ka kya gila kije

yahi bahao safine rawan bhi rakhta tha

tu ye na dekh ki sab Tahniyan salamat hain

ki ye daraKHt tha aur pattiyan bhi rakhta tha

har ek zarra tha gardish mein aasman ki tarah

main apna panw zamin par jahan bhi rakhta tha

lipaT bhi jata tha aksar wo mere sine se

aur ek fasla sa darmiyan bhi rakhta tha