musafirat mein shab-e-wagha tak pahunch gae hain

musāfirat meñ shab-e-vaġhā tak pahuñch ga.e haiñ

ye log apnī abad-sarā tak pahuñch ga.e haiñ

ab is se aglā safar hamārā lahū karegā

ki ham madīne se karbalā tak pahuñch ga.e haiñ

agar mubāraz-talab nahīñ the to kis liye ham

charāġh le kar dar-e-havā tak pahuñch ga.e haiñ

gulāboñ aur gardanoñ se andāza ho rahā hai

ki ham kisī mausam-e-jazā tak pahuñch ga.e haiñ

tirī mohabbat meñ gumrahī kā ajab nasha thā

ki tujh tak aate hue ḳhudā tak pahuñch ga.e haiñ

batā rahī hai ye ḳhushk pattoñ kī tez bārish

ham apne mausam kī ibtidā tak pahuñch ga.e haiñ

hameñ bhī shunvā.ī kā yaqīñ ho chalā hai 'tābish'

ki ham bhī tahrīk-e-iltivā tak pahuñch ga.e haiñ

musafirat mein shab-e-wagha tak pahunch gae hain

ye log apni abad-sara tak pahunch gae hain

ab is se agla safar hamara lahu karega

ki hum madine se karbala tak pahunch gae hain

agar mubaraz-talab nahin the to kis liye hum

charagh le kar dar-e-hawa tak pahunch gae hain

gulabon aur gardanon se andaza ho raha hai

ki hum kisi mausam-e-jaza tak pahunch gae hain

teri mohabbat mein gumrahi ka ajab nasha tha

ki tujh tak aate hue KHuda tak pahunch gae hain

bata rahi hai ye KHushk patton ki tez barish

hum apne mausam ki ibtida tak pahunch gae hain

hamein bhi shunwai ka yaqin ho chala hai 'tabish'

ki hum bhi tahrik-e-iltiwa tak pahunch gae hain