mushaf-e-ruKHsar par zulf-e-pareshan dekh kar

mus.haf-e-ruḳhsār par zulf-e-pareshāñ dekh kar

huuñ pareshāñ kufr ke saa.e meñ īmāñ dekh kar

ai sitam-ījād ai ġhārat-gar-e-sabr-o-sukūñ

dil pareshāñ hai tirī zulf-e-pareshāñ dekh kar

josh-e-vahshat meñ jo aa niklā maiñ gulshan kī taraf

hañs paḌe haiñ gul mirā chāk-e-garebāñ dekh kar

mauj-e-bahr-e-ġham se kheleñ kyoñ na āshufta-mizāj

himmat-e-dil aur baḌh jaatī hai tūfāñ dekh kar

sirf sabza hī nahīñ jaur-e-ḳhizāñ se pā.emāl

hai kalī bhī muzmahil rang-e-gulistāñ dekh kar

un kī yaad aate hī dil yuuñ kaañp uThtā hai 'riyāz'

jis tarah chauñke koī ḳhvāb-e-pareshāñ dekh kar

mushaf-e-ruKHsar par zulf-e-pareshan dekh kar

hun pareshan kufr ke sae mein iman dekh kar

ai sitam-ijad ai ghaarat-gar-e-sabr-o-sukun

dil pareshan hai teri zulf-e-pareshan dekh kar

josh-e-wahshat mein jo aa nikla main gulshan ki taraf

hans paDe hain gul mera chaak-e-gareban dekh kar

mauj-e-bahr-e-gham se khelen kyon na aashufta-mizaj

himmat-e-dil aur baDh jati hai tufan dekh kar

sirf sabza hi nahin jaur-e-KHizan se paemal

hai kali bhi muzmahil rang-e-gulistan dekh kar

un ki yaad aate hi dil yun kanp uThta hai 'riyaz'

jis tarah chaunke koi KHwab-e-pareshan dekh kar