mushk-dani mein hi KHushbu ko dabae rakhna

mushk-dānī meñ hī ḳhushbū ko dabā.e rakhnā

us se mushkil hai mohabbat ko chhupā.e rakhnā

kar ke chhoḌegī vo nafrat ko kabhī ḳhākistar

dil meñ ik aag mohabbat kī lagā.e rakhnā

maiñ kabhī bhī tirī dahlīz pe aa saktā huuñ

apnī palkoñ ko sar-e-rāh bichhā.e rakhnā

āj-kal ahl-e-siyāsat kā hunar hai ye to

pas-e-muskān kudūrat ko chhupā.e rakhnā

garche hālāt mohabbat meñ hoñ kuchh bhī lekin

tum pe lāzim hai qadam apne jamā.e rakhnā

zālimoñ ko hai ujāle kī zarūrat 'hādī'

abhī chhappar kahī bastī meñ jalā.e rakhnā

mushk-dani mein hi KHushbu ko dabae rakhna

us se mushkil hai mohabbat ko chhupae rakhna

kar ke chhoDegi wo nafrat ko kabhi KHakistar

dil mein ek aag mohabbat ki lagae rakhna

main kabhi bhi teri dahliz pe aa sakta hun

apni palkon ko sar-e-rah bichhae rakhna

aaj-kal ahl-e-siyasat ka hunar hai ye to

pas-e-muskan kudurat ko chhupae rakhna

garche haalat mohabbat mein hon kuchh bhi lekin

tum pe lazim hai qadam apne jamae rakhna

zalimon ko hai ujale ki zarurat 'hadi'

abhi chhappar kahi basti mein jalae rakhna