mushtaq ba-dastur zamana hai tumhaara

mushtāq ba-dastūr zamāna hai tumhārā

aane se fusūñ-ḳhez na aanā hai tumhārā

lailā kī hikāyat bhī hikāyat hai tumhārī

shīrīñ kā fasāna bhī fasāna hai tumhārā

is dil kī ḳhabar tum se ziyāda kise hogī

andāz magar be-ḳhabarāna hai tumhārā

tum husn-e-mujassam ho bilā-shirkat-e-ġhaire

nā-qābil-e-taqsīm ḳhazāna hai tumhārā

dil meñ koī aa jaa.e to vāpas nahīñ jaatā

dushvār yahāñ se kahīñ jaanā hai tumhārā

tum se muta.assir haiñ na.e hoñ ki purāne

uslūb nayā hai ki purānā hai tumhārā

kyuuñ raushnī-o-rañg se ma.amūr na ho dil

sunsān sahī ā.ina-ḳhāna hai tumhārā

samjhāyā bujhāyā na karo dil ko 'shu.ūr' ab

kambaḳht ne kahnā kabhī maanā hai tumhārā

mushtaq ba-dastur zamana hai tumhaara

aane se fusun-KHez na aana hai tumhaara

laila ki hikayat bhi hikayat hai tumhaari

shirin ka fasana bhi fasana hai tumhaara

is dil ki KHabar tum se ziyaada kise hogi

andaz magar be-KHabarana hai tumhaara

tum husn-e-mujassam ho bila-shirkat-e-ghaire

na-qabil-e-taqsim KHazana hai tumhaara

dil mein koi aa jae to wapas nahin jata

dushwar yahan se kahin jaana hai tumhaara

tum se mutassir hain nae hon ki purane

uslub naya hai ki purana hai tumhaara

kyun raushni-o-rang se mamur na ho dil

sunsan sahi aaina-KHana hai tumhaara

samjhaya bujhaya na karo dil ko 'shuur' ab

kambaKHt ne kahna kabhi mana hai tumhaara