muskura kar aashiqon par mehrbani kijiye

muskurā kar āshiqoñ par mehrbānī kījiye

bulbuloñ kī pās-e-ḳhātir gul-fishānī kījiye

ishq ne az-bas diyā hai zard-rañgī kā rivāj

arġhuvānī āñsuoñ kuuñ zāfrānī kījiye

mai-kash-e-ġham kuuñ shab-e-mahtāb hai mū-e-safed

mausam-e-pīrī meñ sāmān-e-javānī kījiye

hijr kī rātoñ meñ lāzim hai bayān-e-zulf-e-yār

niind to jaatī rahī hai qissa-ḳhvānī kījiye

yār-e-jānī to zamāne meñ nipaT kam-yāb haiñ

kījiye dushman agar apnā to jaanī kījiye

mat ho ai dil tuuñ sadā bulbul hazāroñ phuul kā

ek baaqī būjhiye baaqī kuuñ faanī kījiye

sab samundar muttafiq ho mujh kuuñ kahte haiñ 'sirāj'

shola-rū ke vasf meñ ātish-bayānī kījiye

muskura kar aashiqon par mehrbani kijiye

bulbulon ki pas-e-KHatir gul-fishani kijiye

ishq ne az-bas diya hai zard-rangi ka riwaj

arghuwani aansuon kun zafrani kijiye

mai-kash-e-gham kun shab-e-mahtab hai mu-e-safed

mausam-e-piri mein saman-e-jawani kijiye

hijr ki raaton mein lazim hai bayan-e-zulf-e-yar

nind to jati rahi hai qissa-KHwani kijiye

yar-e-jaani to zamane mein nipaT kam-yab hain

kijiye dushman agar apna to jaani kijiye

mat ho ai dil tun sada bulbul hazaron phul ka

ek baqi bujhiye baqi kun fani kijiye

sab samundar muttafiq ho mujh kun kahte hain 'siraj'

shola-ru ke wasf mein aatish-bayani kijiye