be-tahasha si la-ubaali hansi

be-tahāshā sī lā-ubālī hañsī

chhin ga.ī ham se vo jiyālī hañsī

lab khule jism muskurāne lagā

phuul kā khilnā thā ki Daalī hañsī

muskurā.ī ḳhudā kī mahviyyat

yā hamārī hī be-ḳhayālī hañsī

kaun be-dard chhīn letā hai

mere phūloñ kī bholī-bhālī hañsī

vo nahīñ thā vahāñ to kaun thā phir

sabz pattoñ meñ kaise laalī hañsī

dhuup meñ khet gungunāne lage

jab koī gaañv kī jiyālī hañsī

hañs paḌī shaam kī udaas fazā

is tarah chaa.e kī pyālī hañsī

maiñ kahīñ jā.ūñ hai ta.āqub meñ

us kī vo jaan lene vaalī hañsī

be-tahasha si la-ubaali hansi

chhin gai hum se wo jiyali hansi

lab khule jism muskurane laga

phul ka khilna tha ki Dali hansi

muskurai KHuda ki mahwiyyat

ya hamari hi be-KHayali hansi

kaun be-dard chhin leta hai

mere phulon ki bholi-bhaali hansi

wo nahin tha wahan to kaun tha phir

sabz patton mein kaise lali hansi

dhup mein khet gungunane lage

jab koi ganw ki jiyali hansi

hans paDi sham ki udas faza

is tarah chae ki pyali hansi

main kahin jaun hai taaqub mein

us ki wo jaan lene wali hansi