mustarad ho gaya jab tera qubula hua main

mustarad ho gayā jab terā qubūlā huā maiñ

yaad kyā ā.ūñgā is tarah se bhūlā huā maiñ

baat mujh meñ bhī kuchh is tarah kī hogī jo yahāñ

kabhī vāpas hī na hotā thā vasūlā huā maiñ

ḳhaak thī aur havā thī mire andar bāhar

dasht ik sāmne thā aur bagūlā huā maiñ

nahīñ marne meñ bhī darkār ta.āvun mujh ko

chhat se apnī hī nazar ā.ūñgā jhūlā huā maiñ

vaqt vo thā ki ḳhad-o-ḳhāl numāyāñ the mire

ab ye hālat hai ki bas ik hayūlā huā maiñ

ye bhī sach hai ki amal mujh pe kisī ne na kiyā

varna kahne ko to mash.hūr maqūla huā maiñ

ik nahūsat hai mire mausamoñ par chhā.ī huī

hai yahī vaj.h ki phaltā nahīñ phūlā huā maiñ

phir kisī se bhī girah mujh pe lagā.ī na ga.ī

koī beDhab hī bahut misrā-e-ūlā huā maiñ

maut ke saath huī hai mirī shādī so 'zafar'

umr ke āḳhirī lamhāt meñ dūlhā huā maiñ

mustarad ho gaya jab tera qubula hua main

yaad kya aaunga is tarah se bhula hua main

baat mujh mein bhi kuchh is tarah ki hogi jo yahan

kabhi wapas hi na hota tha wasula hua main

KHak thi aur hawa thi mere andar bahar

dasht ek samne tha aur bagula hua main

nahin marne mein bhi darkar taawun mujh ko

chhat se apni hi nazar aaunga jhula hua main

waqt wo tha ki KHad-o-KHal numayan the mere

ab ye haalat hai ki bas ek hayula hua main

ye bhi sach hai ki amal mujh pe kisi ne na kiya

warna kahne ko to mashhur maqula hua main

ek nahusat hai mere mausamon par chhai hui

hai yahi wajh ki phalta nahin phula hua main

phir kisi se bhi girah mujh pe lagai na gai

koi beDhab hi bahut misra-e-ula hua main

maut ke sath hui hai meri shadi so 'zafar'

umr ke aaKHiri lamhat mein dulha hua main