muTThi mein chhupate hain guhar bolte kam hain

muTThī meñ chhupāte haiñ guhar bolte kam haiñ

jo log ki rakhte haiñ hunar bolte kam haiñ

ab shoḳhī-e-guftār azīzoñ meñ nahīñ hai

milte haiñ sar-e-rāh magar bolte kam haiñ

ashkoñ hī se kuchh haal ayaañ ho to ayaañ ho

ushshāq to ai dīda-e-tar bolte kam haiñ

lagtā hai ki ġhāfil haiñ zamāne se ye darvesh

rakhte haiñ do-ālam kī ḳhabar bolte kam haiñ

is fan meñ 'sharīf' aap hī yaktā to nahīñ haiñ

haiñ ahl-e-suḳhan aur bhī par bolte kam haiñ

muTThi mein chhupate hain guhar bolte kam hain

jo log ki rakhte hain hunar bolte kam hain

ab shoKHi-e-guftar azizon mein nahin hai

milte hain sar-e-rah magar bolte kam hain

ashkon hi se kuchh haal ayan ho to ayan ho

ushshaq to ai dida-e-tar bolte kam hain

lagta hai ki ghafil hain zamane se ye darwesh

rakhte hain do-alam ki KHabar bolte kam hain

is fan mein 'sharif' aap hi yakta to nahin hain

hain ahl-e-suKHan aur bhi par bolte kam hain