musa hain hamin jalwa-e-didar hamin hain

muusā haiñ hamīñ jalva-e-dīdār hamīñ haiñ

haiñ tuur hamīñ nuur hamīñ naar hamīñ haiñ

mansūr hamīñ haiñ suḳhan-e-yār hamīñ haiñ

qaazī haiñ hamīñ shar.a hamīñ daar hamīñ haiñ

kāfir jise kahte haiñ hamīñ se hai ishāra

momin hai ġharaz jis se vo dīñ-dār hamīñ haiñ

firdaus agar hai to hamāre hī liye hai

dozaḳh ke agar haiñ to sazā-vār hamīñ haiñ

haiñ dād-o-sitad donoñ ye bande hī kī shāneñ

baa.e haiñ hamīñ aur ḳharīdār hamīñ haiñ

mar jaane se jo hijr meñ ḳhush hai vo hamīñ haiñ

jiine se jo furqat meñ hai bezār hamīñ haiñ

qāsid haiñ hamīñ aur hamīñ kātib-e-nāma

dil-dār hamīñ nāma-e-dildār hamīñ haiñ

nasūt jo maskan hai to lāhūt ghar apnā

ḳhalvat meñ hamīñ barsar-e-bāzār hamīñ haiñ

mashshāta hamīñ aur hamīñ shāna-o-gesū

ā.īna hamīñ aks-e-ruḳh-e-yār hamīñ haiñ

kahte haiñ jise kufr vo ik shaan hai apnī

islām jise kahte haiñ abrār hamīñ haiñ

nāqūs kī āvāz hamārī hī sadā hai

takbīr ke alfāz meñ har baar hamīñ haiñ

dariyā meñ hamīñ aur hamīñ mauj-o-sadaf haiñ

qatra haiñ hamīñ gauhar-e-shahvār hamīñ haiñ

'akbar' jo hai masjūd-e-do-ālam vo vahī hai

sajde ke agar haiñ to sazā-vār hamīñ haiñ

musa hain hamin jalwa-e-didar hamin hain

hain tur hamin nur hamin nar hamin hain

mansur hamin hain suKHan-e-yar hamin hain

qazi hain hamin shara hamin dar hamin hain

kafir jise kahte hain hamin se hai ishaara

momin hai gharaz jis se wo din-dar hamin hain

firdaus agar hai to hamare hi liye hai

dozaKH ke agar hain to saza-war hamin hain

hain dad-o-sitad donon ye bande hi ki shanen

bae hain hamin aur KHaridar hamin hain

mar jaane se jo hijr mein KHush hai wo hamin hain

jine se jo furqat mein hai bezar hamin hain

qasid hain hamin aur hamin katib-e-nama

dil-dar hamin nama-e-dildar hamin hain

nasut jo maskan hai to lahut ghar apna

KHalwat mein hamin barsar-e-bazar hamin hain

mashshata hamin aur hamin shana-o-gesu

aaina hamin aks-e-ruKH-e-yar hamin hain

kahte hain jise kufr wo ek shan hai apni

islam jise kahte hain abrar hamin hain

naqus ki aawaz hamari hi sada hai

takbir ke alfaz mein har bar hamin hain

dariya mein hamin aur hamin mauj-o-sadaf hain

qatra hain hamin gauhar-e-shahwar hamin hain

'akbar' jo hai masjud-e-do-alam wo wahi hai

sajde ke agar hain to saza-war hamin hain