موسیٰ ہیں ہمیں جلوۂ دیدار ہمیں ہیں

موسیٰ ہیں ہمیں جلوۂ دیدار ہمیں ہیں

ہیں طور ہمیں نور ہمیں نار ہمیں ہیں

کافر جسے کہتے ہیں ہمیں سے ہے اشارہ

مومن ہے غرض جس سے وہ دیں دار ہمیں ہیں

فردوس اگر ہے تو ہمارے ہی لئے ہے

دوزخ کے اگر ہیں تو سزاوار ہمیں ہیں

ناسوت جو مسکن ہے تو لاہوت گھر اپنا

خلوت میں ہمیں بر سر بازار ہمیں ہیں

ناقوس کی آواز ہماری ہی صدا ہے

تکبیر کے الفاظ میں ہر بار ہمیں ہیں

اکبرؔ جو ہے مسجود دو عالم وہ وہی ہے

سجدے کے اگر ہیں تو سزاوار ہمیں ہیں