na aarzuon ka chand chamka na qurbaton ke gulab mahke

na ārzūoñ kā chāñd chamkā na qurbatoñ ke gulāb mahke

na hijratoñ kā 'azāb sahte hue musāfir gharoñ ko lauTe

na āñganoñ meñ daraḳht-e-jāñ par visāl-mausam kā bor jaagā

na Daalī Daalī kisī parinde ne ḳhushbuoñ ke tarāne chheḌe

varaq varaq zā.ichoñ meñ tahrīr ek se the javāb lekin

savāl chakhne kī ḳhaam ḳhvāhish meñ ham ne kyā kyā 'azāb chakkhe

bas ek Dhalvān darmiyāñ hai aur us se aage khulā jahannam

na jaane kis pal kī ek laġhzish 'azāb sadiyāñ sameT laa.e

hameñ ḳhabar hai ki apne ghar ke charāġh koī ghaḌī haiñ lekin

hameñ yaqīñ hai ki raushnī kī naved sunñe talak jaleñge

qabīle vaalo uTho! aur apnā bachāv kar lo, ki maiñ ne kal shab

fasīl-e-shahr-e-amāñ ke bāhar naqab-zanoñ ke giroh dekhe

na aarzuon ka chand chamka na qurbaton ke gulab mahke

na hijraton ka 'azab sahte hue musafir gharon ko lauTe

na aanganon mein daraKHt-e-jaan par visal-mausam ka bor jaga

na Dali Dali kisi parinde ne KHushbuon ke tarane chheDe

waraq waraq zaichon mein tahrir ek se the jawab lekin

sawal chakhne ki KHam KHwahish mein hum ne kya kya 'azab chakkhe

bas ek Dhalwan darmiyan hai aur us se aage khula jahannam

na jaane kis pal ki ek laghzish 'azab sadiyan sameT lae

hamein KHabar hai ki apne ghar ke charagh koi ghaDi hain lekin

hamein yaqin hai ki raushni ki nawed sunne talak jalenge

qabile walo uTho! aur apna bachaw kar lo, ki main ne kal shab

fasil-e-shahr-e-aman ke bahar naqab-zanon ke giroh dekhe