na ab wo ishq na wo ishq ki adaen rahin

na ab vo ishq na vo ishq kī adā.eñ rahīñ

na ab vo husn na vo husn kī havā.eñ rahīñ

na ishq ishq rahā ab na husn husn rahā

na vo vafā.eñ rahīñ ab na vo jafā.eñ rahīñ

vo husn-o-ishq ke rāz-o-niyāz hī na rahe

na vo ḳhatā.eñ rahīñ ab na vo sazā.eñ rahīñ

mizāj-e-husn-o-mohabbat meñ sādgī na fareb

na vo yaqīn rahā ab na vo daġhā.eñ rahīñ

ġhurūr-e-husn kī be-iltifātiyoñ kī tarah

nigāh-e-shauq rahī ab na iltijā.eñ rahīñ

na vo ayādat-o-taskīñ na vo dil-e-ranjūr

na ab vo dard-e-mohabbat na vo davā.eñ rahīñ

na zindagī se vo nafrat na maut kī hasrat

vo bad-duā.eñ rahīñ ab na vo duā.eñ rahīñ

rabāb-e-isq na mizrāb-e-husn kuchh bhī nahīñ

vo naġhma-hā-e-tamannā na vo sadā.eñ rahīñ

na mai-kada na vo mai-ḳhvār aur na vo saaqī

na vo chaman na bahāreñ na vo ghaTā.eñ rahīñ

badal ga.e sahar-o-shām-e-zindagī 'bismil'

vo zindagī ke manāzir na vo fazā.eñ rahīñ

na ab wo ishq na wo ishq ki adaen rahin

na ab wo husn na wo husn ki hawaen rahin

na ishq ishq raha ab na husn husn raha

na wo wafaen rahin ab na wo jafaen rahin

wo husn-o-ishq ke raaz-o-niyaz hi na rahe

na wo KHataen rahin ab na wo sazaen rahin

mizaj-e-husn-o-mohabbat mein sadgi na fareb

na wo yaqin raha ab na wo daghaen rahin

ghurur-e-husn ki be-iltifatiyon ki tarah

nigah-e-shauq rahi ab na iltijaen rahin

na wo ayaadat-o-taskin na wo dil-e-ranjur

na ab wo dard-e-mohabbat na wo dawaen rahin

na zindagi se wo nafrat na maut ki hasrat

wo bad-duaen rahin ab na wo duaen rahin

rabab-e-isq na mizrab-e-husn kuchh bhi nahin

wo naghma-ha-e-tamanna na wo sadaen rahin

na mai-kada na wo mai-KHwar aur na wo saqi

na wo chaman na bahaaren na wo ghaTaen rahin

badal gae sahar-o-sham-e-zindagi 'bismil'

wo zindagi ke manazir na wo fazaen rahin