na ada mujhse hua us sitam-ijad ka haq

na adā mujh se huā us sitam-ījād kā haq

merī gardan pe rahā ḳhanjar-e-bedād kā haq

nāseho gar na sunūñ maiñ mirī qismat kā qusūr

tum ne irshād kiyā jo ki hai irshād kā haq

yaad to haq kī tujhe yaad hī par yaad rahī

yaar dushvār hai vo yaad jo hai yaad kā haq

apnī tasvīr pe sadqe tire sadqe kar use

isī sūrat se adā hovegā bahzād kā haq

haq ko bātil koī kis tarah se kah de ai but

kahīñ saanī nahīñ us husn-e-ḳhudā-dād kā haq

jāñ-kanī pesha ho jis kā vo lahaq hai terā

tujh pe shīrīñ hai na ḳhusrav kā na farhād kā haq

bār-e-ehsāñ se nahīñ sar bhī uThā saktā huuñ

mere sar par hī rahā us mire jallād kā haq

sun ke kahtā hai yahāñ kaun hai suntā mat sun

sunñe vaalā hī sunā is mirī fariyād kā haq

vahī insān hai 'ehsāñ' ki jise ilm hai kuchh

haq ye hai baap se afzūñ rahe ustād kā haq

na ada mujh se hua us sitam-ijad ka haq

meri gardan pe raha KHanjar-e-bedad ka haq

naseho gar na sunun main meri qismat ka qusur

tum ne irshad kiya jo ki hai irshad ka haq

yaad to haq ki tujhe yaad hi par yaad rahi

yar dushwar hai wo yaad jo hai yaad ka haq

apni taswir pe sadqe tere sadqe kar use

isi surat se ada howega bahzad ka haq

haq ko baatil koi kis tarah se kah de ai but

kahin sani nahin us husn-e-KHuda-dad ka haq

jaan-kani pesha ho jis ka wo lahaq hai tera

tujh pe shirin hai na KHusraw ka na farhad ka haq

bar-e-ehsan se nahin sar bhi uTha sakta hun

mere sar par hi raha us mere jallad ka haq

sun ke kahta hai yahan kaun hai sunta mat sun

sunne wala hi suna is meri fariyaad ka haq

wahi insan hai 'ehsan' ki jise ilm hai kuchh

haq ye hai bap se afzun rahe ustad ka haq