na bachpan mein kaho hum ko kaDi baat

na bachpan meñ kaho ham ko kaḌī baat

na khulvāo ki chhoTā muñh baḌī baat

suno to gauhar-e-dandāñ kī tārīf

abhī ho jaa.e motī kī laḌī baat

baḌe andher kī taz.īn hai aaj

na hone degī missī kī dhaḌī baat

jahāñ aġhyār un ke paas baiThe

vahīñ bas ho ga.ī koī ghaḌī baat

payām-e-vasl par vo ho ga.e tursh

ġhazab aayā khaTā.ī meñ paḌī baat

ham un se aaj kā shikva kareñge

ukhāḌeñge vo barsoñ kī gaḌī baat

tabī.at un kī hai kuchh ukhḌī ukhḌī

kisī ne phir vahāñ merī juḌī baat

ye kis mizhgāñ kī barchhī kā thā mazkūr

anī ho kar kaleje meñ aḌī baat

'saḳhī' vo yuuñ to boleñge na ham se

kabhī ho jā.egī dhoke-dhaḌī baat

na bachpan mein kaho hum ko kaDi baat

na khulwao ki chhoTa munh baDi baat

suno to gauhar-e-dandan ki tarif

abhi ho jae moti ki laDi baat

baDe andher ki tazin hai aaj

na hone degi missi ki dhaDi baat

jahan aghyar un ke pas baiThe

wahin bas ho gai koi ghaDi baat

payam-e-wasl par wo ho gae tursh

ghazab aaya khaTai mein paDi baat

hum un se aaj ka shikwa karenge

ukhaDenge wo barson ki gaDi baat

tabiat un ki hai kuchh ukhDi ukhDi

kisi ne phir wahan meri juDi baat

ye kis mizhgan ki barchhi ka tha mazkur

ani ho kar kaleje mein aDi baat

'saKHi' wo yun to bolenge na hum se

kabhi ho jaegi dhoke-dhaDi baat