na baDh sakenge qadam kahan tak na uTh sakegi nigah kab tak

na baḌh sakeñge qadam kahāñ tak na uTh sakegī nigāh kab tak

mire junūñ kī hañsī uḌāyā kareñge ye mehr-o-māh kab tak

ġham-e-mohabbat kī dastaras se nikal chukā ab ġham-e-zamāna

tirī nigāheñ bhī de sakeñgī dil-e-hazīñ ko panāh kab tak

har ek lahza har ek saa.at na.e havādis na.e masā.ib

ye zindagī hai to zindagī se karegā koī nibāh kab tak

tujhe mubārak tire irāde ye raaz mujh ko magar batā de

tirī mashiyyat rahegī yā-rab mire liye sadd-e-rāh kab tak

ye qāfile jo ravāñ-davāñ haiñ abhī kahāñ the abhī kahāñ haiñ

junūñ salāmat agar hai 'rāhī' to koī rokegā raah kab tak

na baDh sakenge qadam kahan tak na uTh sakegi nigah kab tak

mere junun ki hansi uDaya karenge ye mehr-o-mah kab tak

gham-e-mohabbat ki dastaras se nikal chuka ab gham-e-zamana

teri nigahen bhi de sakengi dil-e-hazin ko panah kab tak

har ek lahza har ek saat nae hawadis nae masaib

ye zindagi hai to zindagi se karega koi nibah kab tak

tujhe mubarak tere irade ye raaz mujh ko magar bata de

teri mashiyyat rahegi ya-rab mere liye sadd-e-rah kab tak

ye qafile jo rawan-dawan hain abhi kahan the abhi kahan hain

junun salamat agar hai 'rahi' to koi rokega rah kab tak