na bahte ashk to tasir mein siwa hote

na bahte ashk to tāsīr meñ sivā hote

sadaf meñ rahte ye motī to be-bahā hote

mujh aise rind se rakhte zarūr hī ulfat

janāb-e-shaiḳh agar āshiq-e-ḳhudā hote

gunāhgāroñ ne dekhā jamāl-e-rahmat ko

kahāñ nasīb ye hotā jo be-ḳhatā hote

janāb-e-hazrat-e-nāseh kā vaah kyā kahnā

jo ek baat na hotī to auliyā hote

mazāq-e-ishq nahīñ sheḳh meñ ye hai afsos

ye chāshnī bhī jo hotī to kyā se kyā hote

mahall-e-shukr haiñ 'akbar' ye darafshāñ nazmeñ

har ik zabāñ ko ye motī nahīñ atā hote

na bahte ashk to tasir mein siwa hote

sadaf mein rahte ye moti to be-baha hote

mujh aise rind se rakhte zarur hi ulfat

janab-e-shaiKH agar aashiq-e-KHuda hote

gunahgaron ne dekha jamal-e-rahmat ko

kahan nasib ye hota jo be-KHata hote

janab-e-hazrat-e-naseh ka wah kya kahna

jo ek baat na hoti to auliya hote

mazaq-e-ishq nahin sheKH mein ye hai afsos

ye chashni bhi jo hoti to kya se kya hote

mahall-e-shukr hain 'akbar' ye darafshan nazmen

har ek zaban ko ye moti nahin ata hote