na barq na shoala ne sharar hun

na barq na sho.ala ne sharar huuñ

jo kahiye so qissa muḳhtasar huuñ

juuñ aks merā kahāñ Thikānā

tere jalve se jalva-gar huuñ

ai naqsh-e-qadam rah-e-fanā meñ

maiñ tujh se Tuk ek peshtar huuñ

ye ḳhair hai ḳhair-e-mahz hai to

banda ganda jo maiñ bashar huuñ

ma.alūm huī na kuchh haqīqat

maiñ kyā huuñ kaun huuñ kidhar huuñ

ai umr-e-ba-bād-e-rafta le chal

maiñ bhī tere hī ham-safar huuñ

juuñ sho.ala miyān-e-be-qarārī

qaa.em apne qarār par huuñ

huuñ nāla-e-nā-rasā va-lekin

apne haq meñ to kārgar huuñ

aate haiñ nazar sabhī hunar-mand

maiñ hī ek saaf be-hunar huuñ

huuñ tīr-e-balā kā maiñ nishānā

shamshīr-e-jafā kā maiñ sipar huuñ

lenā mirī ḳhair-ḳhabar to ḳhair dilā

ġhāfil huuñ nipaT hī be-ḳhabar huuñ

bhūle bhī kabhū na yaad karnā

bār-e-ḳhātir maiñ is qadar huuñ

huuñ laġhv maiñ aap apnī zātoñ

auroñ kā naf.a ne zarar huuñ

tere dāman se lag rahā huuñ

apnī tar-dāmanī se tar huuñ

dard kī zāt-e-pāk kā hai

go ain nahīñ vale 'asar' huuñ

na barq na shoala ne sharar hun

jo kahiye so qissa muKHtasar hun

jun aks mera kahan Thikana

tere jalwe se jalwa-gar hun

ai naqsh-e-qadam rah-e-fana mein

main tujh se Tuk ek peshtar hun

ye KHair hai KHair-e-mahz hai to

banda ganda jo main bashar hun

malum hui na kuchh haqiqat

main kya hun kaun hun kidhar hun

ai umr-e-ba-baad-e-rafta le chal

main bhi tere hi ham-safar hun

jun shoala miyan-e-be-qarari

qaem apne qarar par hun

hun nala-e-na-rasa wa-lekin

apne haq mein to kargar hun

aate hain nazar sabhi hunar-mand

main hi ek saf be-hunar hun

hun tir-e-bala ka main nishana

shamshir-e-jafa ka main sipar hun

lena meri KHair-KHabar to KHair dila

ghafil hun nipaT hi be-KHabar hun

bhule bhi kabhu na yaad karna

bar-e-KHatir main is qadar hun

hun laghw main aap apni zaton

auron ka nafa ne zarar hun

tere daman se lag raha hun

apni tar-damani se tar hun

dard ki zat-e-pak ka hai

go ain nahin wale 'asar' hun