na bikhraya karo tum baiThe baiThe zulf-e-pechan ko

na bikhrāyā karo tum baiThe baiThe zulf-e-pechāñ ko

ḳhudā ke vāste dekho mire hāl-e-pareshāñ ko

ajab andāz se pis pis ke hoñToñ se nikaltī hai

karūñ qurbān terī ik nahīñ par saiñkaḌoñ haañ ko

ḳhudā jaane mazā aatā hai kyā is meñ ki hañs hañs kar

vo pahroñ dekhte rahte haiñ mere zaḳhm-e-ḳhandāñ ko

unheñ phir is ne bhaḌkāyā hue garm-e-jafā phir vo

ilāhī aag lag jaa.e hamārī chashm-e-giryāñ ko

qayāmat kā samāñ phirne lagā hai merī āñkhoñ meñ

ki jab se maiñ ne dekhā hai kisī kī chashm-e-fattāñ ko

baḌhī dīvāngī merī kuchh aisī ishq-e-gesū meñ

ki mere naam se hotī hai vahshat ab bayābāñ ko

ga.e vo din manāte the kisī ke saath ham sāvan

ki ab to dekhte rahte haiñ apnī chashm-e-giryāñ ko

abhī to hai shurūa-e-fasl-e-gul josh-e-junūñ taaza

rafū kyoñ log karte haiñ mire chāk-e-garebāñ ko

tire aate hī jhāḌū phir ga.ī kis kis ko ro.eñ ham

alam ko yaas ko hasrat ko betābi ko armāñ ko

mire shevan se to āzurda the phir ro diye āḳhir

nazar aaya jo maiñ jaatā huā shahr-e-ḳhamoshāñ ko

baḌhe phir nāḳhun-e-vahshat ki ayyām-e-bahār aa.e

zarā hushiyār rahnā ai hamāre zaḳhm ke Tāñko

mirī āñkheñ hī dushman ho ga.iiñ haq meñ mire āḳhir

isī raste utārā us ne dil meñ tīr-e-mizhgāñ ko

balā se gar hamārī jān-e-muztar par gire bijlī

usī andāz se ik baar phir ġhurfe se tum jhāñko

huī jaatī hai kyā kyā loT is par rahmat-e-bārī

koī dekhe to mahshar meñ hamārī sharm-e-isyāñ ko

na rakkhā jaane ke qābil mujhe betābī-e-dil ne

kiyā thā maiñ ne kis mushkil se raazī us ke darbāñ ko

mujhe sar phoḌne kī aarzū thī yuuñ huī puurī

girāyā sar pe sail-e-ashk ne dīvār-e-zindāñ ko

mire girya kī tuġhyānī hai goyā nuuh kā tūfāñ

girāyā sar pe sail-e-ashk ne dīvār-e-zindāñ ko

kisī yūsuf-liqā kī yaad meñ royā huuñ maiñ itnā

girāyā sar pe sail-e-ashk ne dīvār-e-zindāñ ko

mirā be-ḳhānumāñ honā mirī qismat meñ likkhā thā

girāyā sar pe sail-e-ashk ne dīvār-e-zindāñ ko

mirī jānib se hai dil meñ ġhubār us be-muravvat ke

nikālegā vo phir kyā ḳhaak mere dil ke armāñ ko

ḳhalish kā zā.iqa madd-e-nazar hai mujh ko ai hamdam

jagah kyūñkar na duuñ dil meñ kisī kī nok-e-mizhgāñ ko

vo aa.e to miTe jaate haiñ kyoñ ye mājrā kyā hai

ilāhī ho gayā ye kyā mirī hasrat ko armāñ ko

phaḌaktī hai rag-e-gardan mirī kyoñ aaj phir 'nashtar'

chaḌhāyā saan par qātil ne shāyad teġh-e-burrāñ ko

na bikhraya karo tum baiThe baiThe zulf-e-pechan ko

KHuda ke waste dekho mere haal-e-pareshan ko

ajab andaz se pis pis ke honTon se nikalti hai

karun qurban teri ek nahin par sainkaDon han ko

KHuda jaane maza aata hai kya is mein ki hans hans kar

wo pahron dekhte rahte hain mere zaKHm-e-KHandan ko

unhen phir is ne bhaDkaya hue garm-e-jafa phir wo

ilahi aag lag jae hamari chashm-e-giryan ko

qayamat ka saman phirne laga hai meri aankhon mein

ki jab se main ne dekha hai kisi ki chashm-e-fattan ko

baDhi diwangi meri kuchh aisi ishq-e-gesu mein

ki mere nam se hoti hai wahshat ab bayaban ko

gae wo din manate the kisi ke sath hum sawan

ki ab to dekhte rahte hain apni chashm-e-giryan ko

abhi to hai shurua-e-fasl-e-gul josh-e-junun taza

rafu kyon log karte hain mere chaak-e-gareban ko

tere aate hi jhaDu phir gai kis kis ko roen hum

alam ko yas ko hasrat ko betabi ko arman ko

mere shewan se to aazurda the phir ro diye aaKHir

nazar aaya jo main jata hua shahr-e-KHamoshan ko

baDhe phir naKHun-e-wahshat ki ayyam-e-bahaar aae

zara hushiyar rahna ai hamare zaKHm ke Tanko

meri aankhen hi dushman ho gain haq mein mere aaKHir

isi raste utara us ne dil mein tir-e-mizhgan ko

bala se gar hamari jaan-e-muztar par gire bijli

usi andaz se ek bar phir ghurfe se tum jhanko

hui jati hai kya kya loT is par rahmat-e-bari

koi dekhe to mahshar mein hamari sharm-e-isyan ko

na rakkha jaane ke qabil mujhe betabi-e-dil ne

kiya tha main ne kis mushkil se raazi us ke darban ko

mujhe sar phoDne ki aarzu thi yun hui puri

giraya sar pe sail-e-ashk ne diwar-e-zindan ko

mere girya ki tughyani hai goya nuh ka tufan

giraya sar pe sail-e-ashk ne diwar-e-zindan ko

kisi yusuf-liqa ki yaad mein roya hun main itna

giraya sar pe sail-e-ashk ne diwar-e-zindan ko

mera be-KHanuman hona meri qismat mein likkha tha

giraya sar pe sail-e-ashk ne diwar-e-zindan ko

meri jaanib se hai dil mein ghubar us be-murawwat ke

nikalega wo phir kya KHak mere dil ke arman ko

KHalish ka zaiqa madd-e-nazar hai mujh ko ai hamdam

jagah kyunkar na dun dil mein kisi ki nok-e-mizhgan ko

wo aae to miTe jate hain kyon ye majra kya hai

ilahi ho gaya ye kya meri hasrat ko arman ko

phaDakti hai rag-e-gardan meri kyon aaj phir 'nashtar'

chaDhaya san par qatil ne shayad tegh-e-burran ko