na Dare barq se dil ki hai kaDi meri aankh

na Dare barq se dil kī hai kaḌī merī aañkh

us kī zanjīr-e-talā.ī se laḌī merī aañkh

apne bīmār ko rakhtī hai chhupā kar tah-e-ḳhāk

kahte haiñ sāhab-e-ġhairat hai baḌī merī aañkh

ḳhaak meñ mil ke ayaañ huuñ gul-e-nargis ban kar

dekh le gar tirī phūloñ kī chhaḌī merī aañkh

is tarah zab.h kiyā teġh-e-nigah se mujh ko

ḳhud vo kahte haiñ ki zālim hai baḌī merī aañkh

dil meñ hai kuchh asar-e-josh-e-mohabbat ab tak

tar huī dekh ke sāvan kī jhaḌī merī aañkh

hasrat-e-dīd meñ pathrā ke banī sañg-e-dar

na haTī phir tire dar par jo aḌī merī aañkh

raat bhar ashk ke dānoñ pe ginā kartī hai

furqat-e-yār meñ ek ek ghaḌī merī aañkh

dil ke TukḌe mirī palkoñ meñ jo dekhā to kahā

jāntī thī inheñ phūloñ kī chhaḌī merī aañkh

rakh liye pesh-e-hubāb-e-lab-e-jū muñh par haath

nazar aa.ī unheñ dariyā meñ paḌī merī aañkh

dauḌ kar mujh se gale mil ga.e milte hī nazar

dil kī taqdīr laḌī yā ki laḌī merī aañkh

ai shab-e-vasl na ma.alūm ye kyā kar ga.ī tū

band hotī nahīñ ab koī ghaḌī merī aañkh

kahte haiñ aañkh laḌāte hī tū patthar ban jaa.e

hai tirā dil to bahut narm kaḌī merī aañkh

yād-e-ḳhāl-e-ruḳh-e-jānāñ kī madad se nāseh

shab furqat ke sitāroñ se laḌī merī aañkh

ho ga.ī fart-e-nazākat se hayā kī shohrat

aa gayā un ko pasīna jo laḌī merī aañkh

hai jo ashkoñ meñ udāhaT to na ghabrā ai dil

roī hai dekh ke missī kī dhaḌī merī aañkh

na Dare barq se dil ki hai kaDi meri aankh

us ki zanjir-e-talai se laDi meri aankh

apne bimar ko rakhti hai chhupa kar tah-e-KHak

kahte hain sahab-e-ghairat hai baDi meri aankh

KHak mein mil ke ayan hun gul-e-nargis ban kar

dekh le gar teri phulon ki chhaDi meri aankh

is tarah zabh kiya tegh-e-nigah se mujh ko

KHud wo kahte hain ki zalim hai baDi meri aankh

dil mein hai kuchh asar-e-josh-e-mohabbat ab tak

tar hui dekh ke sawan ki jhaDi meri aankh

hasrat-e-did mein pathra ke bani sang-e-dar

na haTi phir tere dar par jo aDi meri aankh

raat bhar ashk ke danon pe gina karti hai

furqat-e-yar mein ek ek ghaDi meri aankh

dil ke TukDe meri palkon mein jo dekha to kaha

jaanti thi inhen phulon ki chhaDi meri aankh

rakh liye pesh-e-hubab-e-lab-e-ju munh par hath

nazar aai unhen dariya mein paDi meri aankh

dauD kar mujh se gale mil gae milte hi nazar

dil ki taqdir laDi ya ki laDi meri aankh

ai shab-e-wasl na malum ye kya kar gai tu

band hoti nahin ab koi ghaDi meri aankh

kahte hain aankh laDate hi tu patthar ban jae

hai tera dil to bahut narm kaDi meri aankh

yaad-e-KHal-e-ruKH-e-jaanan ki madad se naseh

shab furqat ke sitaron se laDi meri aankh

ho gai fart-e-nazakat se haya ki shohrat

aa gaya un ko pasina jo laDi meri aankh

hai jo ashkon mein udahaT to na ghabra ai dil

roi hai dekh ke missi ki dhaDi meri aankh