na de fareb-e-wafa le na imtihan apna

na de fareb-e-vafā le na imtihāñ apnā

hai be-niyāz-e-karam yār-e-bad-gumāñ apnā

pahuñch chuke the sar-e-shāḳh-e-gul asiir hue

luTā hai sāmne manzil ke kārvāñ apnā

har ek zarra-e-ālam hai aur sajda-e-shauq

rakheñ uThā ke vo ab sañg-e-āstāñ apnā

vahī hai ālam-e-afsurdagī vahī ham haiñ

ḳhushī kā jis meñ guzar ho vo dil kahāñ apnā

nigāh-e-yās hai tafsīr-e-sad-hazār niyāz

sukūt laakh bayānoñ kā ik bayāñ apnā

fareb hī sahī taskīn kuchh to hai dil ko

rahe ḳhudā kare qaa.em yūñhī gumāñ apnā

vafā kā naam hī duniyā se uTh chukā 'kaifī'

kahāñ zamāne meñ ab koī qadr-dāñ apnā

na de fareb-e-wafa le na imtihan apna

hai be-niyaz-e-karam yar-e-bad-guman apna

pahunch chuke the sar-e-shaKH-e-gul asir hue

luTa hai samne manzil ke karwan apna

har ek zarra-e-alam hai aur sajda-e-shauq

rakhen uTha ke wo ab sang-e-astan apna

wahi hai aalam-e-afsurdagi wahi hum hain

KHushi ka jis mein guzar ho wo dil kahan apna

nigah-e-yas hai tafsir-e-sad-hazar niyaz

sukut lakh bayanon ka ek bayan apna

fareb hi sahi taskin kuchh to hai dil ko

rahe KHuda kare qaem yunhi guman apna

wafa ka nam hi duniya se uTh chuka 'kaifi'

kahan zamane mein ab koi qadr-dan apna