na dekhunga hasinon ko are tauba na dekhunga

na dekhūñgā hasīnoñ ko are tauba na dekhūñgā

taqāzā laakh tū kar ai dil-e-shaidā na dekhūñgā

karūñ nāseh maiñ kyūñkar haa.e ye va.ada na dekhūñgā

nazar paḌ jā.egī ḳhud hī jo dānista na dekhūñgā

nigāh-e-nāz ko terī maiñ sharminda na dekhūñgā

haTā.e letā huuñ apnī nazar achchhā na dekhūñgā

vo kahte haiñ na samjhūñgā tujhe 'majzūb' maiñ āshiq

ki jab tak kūcha o bāzār meñ rusvā na dekhūñgā

balā se maiñ agar ro ro ke bīnā.ī bhī kho baiThūñ

karūñgā kyā in āñkhoñ ko jo vo jalva na dekhūñgā

balā se mere dil par merī jaañ kuchh hī guzar jaa.e

maiñ terī ḳhātir-e-nāzuk ko āzurda na dekhūñgā

uThā.ūñgā na zaanū se maiñ hargiz apnā sar hamdam

are maiñ apnī āñkhoñ se unheñ jaatā na dekhūñgā

hasīnoñ se vahī phir hazrat-e-dil dīda-bāzī hai

abhī to kar rahe the aap ye da.avā na dekhūñgā

zarā ai nāseh-e-farzānā chal kar sun to do bāteñ

na hogā phir bhī tū 'majzūb' kā dīvāna dekhūñgā

na dekhunga hasinon ko are tauba na dekhunga

taqaza lakh tu kar ai dil-e-shaida na dekhunga

karun naseh main kyunkar hae ye wada na dekhunga

nazar paD jaegi KHud hi jo danista na dekhunga

nigah-e-naz ko teri main sharminda na dekhunga

haTae leta hun apni nazar achchha na dekhunga

wo kahte hain na samjhunga tujhe 'majzub' main aashiq

ki jab tak kucha o bazar mein ruswa na dekhunga

bala se main agar ro ro ke binai bhi kho baiThun

karunga kya in aankhon ko jo wo jalwa na dekhunga

bala se mere dil par meri jaan kuchh hi guzar jae

main teri KHatir-e-nazuk ko aazurda na dekhunga

uThaunga na zanu se main hargiz apna sar hamdam

are main apni aankhon se unhen jata na dekhunga

hasinon se wahi phir hazrat-e-dil dida-bazi hai

abhi to kar rahe the aap ye dawa na dekhunga

zara ai naseh-e-farzana chal kar sun to do baaten

na hoga phir bhi tu 'majzub' ka diwana dekhunga