na dosti se rahe aur na dushmani se rahe

na dostī se rahe aur na dushmanī se rahe

hameñ tamām gile apnī āgahī se rahe

vo paas aa.e to mauzū-e-guftugū na mile

vo lauT jaa.e to har guftugū usī se rahe

ham apnī raah chale log apnī raah chale

yahī sabab hai ki ham sargirāñ sabhī se rahe

vo gardisheñ haiñ ki chhuT jaa.eñ ḳhud hī baat se haat

ye zindagī ho to kyā rabt-e-jāñ kisī se rahe

kabhī milā vo sar-e-rahguzar to milte hī

nazar churāne lagā ham bhī ajnabī se rahe

gudāz-qalb kahe koī yā ki harjā.ī

ḳhulūs o dard ke rishte yahāñ sabhī se rahe

na dosti se rahe aur na dushmani se rahe

hamein tamam gile apni aagahi se rahe

wo pas aae to mauzu-e-guftugu na mile

wo lauT jae to har guftugu usi se rahe

hum apni rah chale log apni rah chale

yahi sabab hai ki hum sargiran sabhi se rahe

wo gardishen hain ki chhuT jaen KHud hi baat se hat

ye zindagi ho to kya rabt-e-jaan kisi se rahe

kabhi mila wo sar-e-rahguzar to milte hi

nazar churane laga hum bhi ajnabi se rahe

gudaz-qalb kahe koi ya ki harjai

KHulus o dard ke rishte yahan sabhi se rahe