na farsh-e-KHak pe Thahrenge naqsh-e-pa ki tarah

na farsh-e-ḳhāk pe Thahreñge naqsh-e-pā kī tarah

ravāñ-davāñ haiñ fazāoñ meñ ham havā kī tarah

pukār vaqt kī nazdīk thī magar ham ne

sunā hai duur se aatī huī sadā kī tarah

sazā.eñ detī hai makr-o-fareb kī duniyā

sadāqatoñ kā hai iz.hār ik ḳhatā kī tarah

ḳhudā kare tujhe ehsās-e-dard-o-ġham na rahe

duā-e-ḳhair vo dete haiñ bad-duā kī tarah

na ho suḳhan meñ jo shān-e-payambarī mumkin

ḳhamosh rah ke bhī dekheñ zarā ḳhudā kī tarah

jhalak dikhā.e kahīñ to umiid kā sūraj

hujūm-e-yās hai umDī huī ghaTā kī tarah

na farsh-e-KHak pe Thahrenge naqsh-e-pa ki tarah

rawan-dawan hain fazaon mein hum hawa ki tarah

pukar waqt ki nazdik thi magar hum ne

suna hai dur se aati hui sada ki tarah

sazaen deti hai makr-o-fareb ki duniya

sadaqaton ka hai izhaar ek KHata ki tarah

KHuda kare tujhe ehsas-e-dard-o-gham na rahe

dua-e-KHair wo dete hain bad-dua ki tarah

na ho suKHan mein jo shan-e-payambari mumkin

KHamosh rah ke bhi dekhen zara KHuda ki tarah

jhalak dikhae kahin to umid ka suraj

hujum-e-yas hai umDi hui ghaTa ki tarah