na ghaur se dekh mere dil ka kabaad aise

na ġhaur se dekh mere dil kā kabāḌ aise

ki maiñ kabhī bhī nahīñ rahā thā ujaaḌ aise

burā ho terā jo band rakhe the maiñ ne ghar ke

to khol aayā baġhair pūchhe kivāḌ aise

jo merī rūh-o-badan ke Tāñke udheḌ Daale

to merī nazroñ pe apnī nazroñ ko gaaḌ aise

samajh na paayā ki toḌ detā yā saath rakhtā

ki is ta.alluq meñ aa ga.ī thī darāḌ aise

ai ishq! rah jā.ūñ phaḌphaḌā ke yuuñ kar de be-bas

so merī gardan meñ apne dāñtoñ ko gaaḌ aise

to merī aadat se merī fitrat hī ho chalā hai

abhī bhī kahtā huuñ mujh ko tū na bigāḌ aise

ye mere baazū hī jañg kā faisla kareñge

pakaḌ le talvār aur mujh ko pachhāḌ aise

tumhāre ġham kā pahāḌ TuuTā to phir ye jaanā

pahāḌoñ par hī to TūTte haiñ pahāḌ aise

hazār minnat hazār minnat hazār mehnat

tujhe manāne ko kar rahā huuñ jugāḌ aise

na ghaur se dekh mere dil ka kabaD aise

ki main kabhi bhi nahin raha tha ujaD aise

bura ho tera jo band rakhe the main ne ghar ke

to khol aaya baghair puchhe kiwaD aise

jo meri ruh-o-badan ke Tanke udheD Dale

to meri nazron pe apni nazron ko gaD aise

samajh na paya ki toD deta ya sath rakhta

ki is talluq mein aa gai thi daraD aise

ai ishq! rah jaun phaDphaDa ke yun kar de be-bas

so meri gardan mein apne danton ko gaD aise

to meri aadat se meri fitrat hi ho chala hai

abhi bhi kahta hun mujh ko tu na bigaD aise

ye mere bazu hi jang ka faisla karenge

pakaD le talwar aur mujh ko pachhaD aise

tumhaare gham ka pahaD TuTa to phir ye jaana

pahaDon par hi to TuTte hain pahaD aise

hazar minnat hazar minnat hazar mehnat

tujhe manane ko kar raha hun jugaD aise