na gul khile na shagufon pe tazgi aai

na gul khile na shagūfoñ pe tāzgī aa.ī

ḳhizāñ ke ba.ad chaman meñ bahār bhī aa.ī

hujūm-e-ġham meñ kahāñ fursat-e-tabassum bhī

zarā bhī yaad nahīñ kab mujhe hañsī aa.ī

koī bhī jāda-e-nau ḳhud-baḳhud nahīñ bantā

ye baat samjhoge jis roz kaj-ravī aa.ī

maiñ ik shajar huuñ uThāte haiñ fā.eda sab log

na dushmanī mirā sheva na be-ruḳhī aa.ī

hamāre saath hamesha ye hādisa guzrā

badal ke bhes raqābat kā dostī aa.ī

zamīñ to ḳhud hī chamaktā huā sitāra hai

na jaane kaise yahāñ tīrgī chalī aa.ī

ġham-e-hayāt salāmat tujhe ḳhudā rakkhe

tire sabab ġham-e-jānāñ meñ puḳhtagī aa.ī

hazār baar sunī hausla-shikan bāteñ

mirī jabīñ pe na koī shikan kabhī aa.ī

kalī ko kaun tabassum se rok saktā hai

savāl ye hai ki phūloñ ko kyuuñ hañsī aa.ī

añdherī raat kā manzar hamesha rahtā hai

kiran ujāle kī ghar meñ kabhī kabhī aa.ī

ḳhudā ke naam pe mardum-kushī rahī jaarī

lahūluhān hī aa.ī hai jo sadī aa.ī

na gul khile na shagufon pe tazgi aai

KHizan ke baad chaman mein bahaar bhi aai

hujum-e-gham mein kahan fursat-e-tabassum bhi

zara bhi yaad nahin kab mujhe hansi aai

koi bhi jada-e-nau KHud-baKHud nahin banta

ye baat samjhoge jis roz kaj-rawi aai

main ek shajar hun uThate hain faeda sab log

na dushmani mera shewa na be-ruKHi aai

hamare sath hamesha ye hadisa guzra

badal ke bhes raqabat ka dosti aai

zamin to KHud hi chamakta hua sitara hai

na jaane kaise yahan tirgi chali aai

gham-e-hayat salamat tujhe KHuda rakkhe

tere sabab gham-e-jaanan mein puKHtagi aai

hazar bar suni hausla-shikan baaten

meri jabin pe na koi shikan kabhi aai

kali ko kaun tabassum se rok sakta hai

sawal ye hai ki phulon ko kyun hansi aai

andheri raat ka manzar hamesha rahta hai

kiran ujale ki ghar mein kabhi kabhi aai

KHuda ke nam pe mardum-kushi rahi jari

lahuluhan hi aai hai jo sadi aai