na gul se kaam hai hum ko na kuchh gulzar se matlab

na gul se kaam hai ham ko na kuchh gulzār se matlab

ba-jāñ rakhte haiñ ik hamdam badal ik yaar se matlab

na kaam aalam se hai ham ko na hūr-ul-ain-e-jannat se

hai ik mad.hosh dānā-tar ba-dil-hoshiyār se matlab

na millat hai na maz.hab hai na hai matlab koī apnā

visāl-e-yār maz.hab hai aur hai dīdār se matlab

tasavvur hai na kaam apnā sivā murshid kī nisbat ke

tujhe hai in dinoñ ai dil shah-e-karrār se matlab

kahā makrū-o-makrullāh ḳhair-ul-mākrīñ jis ne

chhupā ḳhud mujh ko zāhir kar hai us makkār se matlab

maiñ vo vāsil huuñ dilbar se ki dil apnā hai vo dilbar

rahā dil hī se kaam apnā usī ġham-ḳhvār se matlab

na ham ye haiñ na ham vo haiñ na ham hargiz haiñ goshe meñ

ġhulām-e-qul-ho-allāh haiñ isī iz.hār se matlab

na kāfir haiñ na momin haiñ na masjid hai na mai-ḳhāna

na tasbīh-o-musallā hai na hai zunnār se matlab

na ham aadam na havvā haiñ na ham hūr-o-malak yaaro

na ham ganjīna pinhāñ haiñ na hai iz.hār se matlab

zavāl-e-jān-o-tan hai yaañ na hirs-o-mā-o-man baaqī

habāb-e-āb-e-dariyā haiñ na hai iftār se matlab

nasab ho yā hasab donoñ mubārak hoveñ zāhid ko

tujhe to hai faqat 'mardāñ' shah-e-abrār se matlab

na gul se kaam hai hum ko na kuchh gulzar se matlab

ba-jaan rakhte hain ek hamdam badal ek yar se matlab

na kaam aalam se hai hum ko na hur-ul-ain-e-jannat se

hai ek madhosh dana-tar ba-dil-hoshiyar se matlab

na millat hai na mazhab hai na hai matlab koi apna

visal-e-yar mazhab hai aur hai didar se matlab

tasawwur hai na kaam apna siwa murshid ki nisbat ke

tujhe hai in dinon ai dil shah-e-karrar se matlab

kaha makru-o-makrullah KHair-ul-makrin jis ne

chhupa KHud mujh ko zahir kar hai us makkar se matlab

main wo wasil hun dilbar se ki dil apna hai wo dilbar

raha dil hi se kaam apna usi gham-KHwar se matlab

na hum ye hain na hum wo hain na hum hargiz hain goshe mein

ghulam-e-qul-ho-allah hain isi izhaar se matlab

na kafir hain na momin hain na masjid hai na mai-KHana

na tasbih-o-musalla hai na hai zunnar se matlab

na hum aadam na hawwa hain na hum hur-o-malak yaro

na hum ganjina pinhan hain na hai izhaar se matlab

zawal-e-jaan-o-tan hai yan na hirs-o-ma-o-man baqi

habab-e-ab-e-dariya hain na hai iftar se matlab

nasab ho ya hasab donon mubarak howen zahid ko

tujhe to hai faqat 'mardan' shah-e-abrar se matlab