na ham-ahang-e-masiha na harif-e-jibril

na ham-āhañg-e-masīhā na harīf-e-jibrīl

terā shā.ir ki hai zindānī-e-gesū-e-jamīl

kis kī āñkhoñ meñ ye ġhaltāñ hai javānī kī sharāb

khol dī aah ye kis ne mai-e-gul-gūñ kī sabīl

kis taraf jaa.e kahāñ jaa.e batā do koī

zulf-e-pur-ḳham kā giraftār nigāhoñ kā qatīl

ālam-e-yās meñ kyā chiiz hai ik sāġhar-e-mai

dasht-e-zulmāt meñ jis tarah ḳhizr kī qindīl

kitnī dushvār hai pīrān-e-haram kī manzil

is taraf fitna-e-iblīs udhar rabb-e-jalīl

uf ye tūfān-e-nashāt aur mirī tab'-e-hazīñ

aah ye yūrish-e-nāz aur maiñ majrūh o aliil

aah vo hosh kā aalam vo ġhamoñ kā tūfāñ

uf ye mastī ki hai phir hosh meñ aane kī dalīl

na ham-ahang-e-masiha na harif-e-jibril

tera shair ki hai zindani-e-gesu-e-jamil

kis ki aankhon mein ye ghaltan hai jawani ki sharab

khol di aah ye kis ne mai-e-gul-gun ki sabil

kis taraf jae kahan jae bata do koi

zulf-e-pur-KHam ka giraftar nigahon ka qatil

aalam-e-yas mein kya chiz hai ek saghar-e-mai

dasht-e-zulmat mein jis tarah KHizr ki qindil

kitni dushwar hai piran-e-haram ki manzil

is taraf fitna-e-iblis udhar rabb-e-jalil

uf ye tufan-e-nashat aur meri tab'-e-hazin

aah ye yurish-e-naz aur main majruh o alil

aah wo hosh ka aalam wo ghamon ka tufan

uf ye masti ki hai phir hosh mein aane ki dalil