na hum apne na wo apne na dil apna na raaz apna

na ham apne na vo apne na dil apnā na raaz apnā

man-o-tū ke jahāñ meñ hai yahī bas imtiyāz apnā

zabāñ un kī hai zikr un kā ḳhayāl un kā hai yaad un kī

na harf-e-naġhma apnā hai na koī tār-e-sāz apnā

do ik be-rang aañsū haiñ do ik be-rabt bāteñ haiñ

na rūdād apnī tūlānī na afsāna darāz apnā

nahīñ mā'lūm ki kaun aa.egā kab aa.egā lekin

dar-e-dīda bhī vā hai aur dar-e-dil bhī hai baaz apnā

ġham-e-jāñ māya-e-rahmat ġham-e-jāñ daulat-e-taskīñ

yahī kuchh kā.enāt apnī yahī kuchh barg-o-sāz apnā

bi-hamdillāh apnī chashm-e-tar hai bā-vazū daa.im

bi-hamdillāh dil har dam hai masrūf-e-namāz apnā

dil apnā saaf hai mānind-e-māh-e-zau-fishāñ 'fitrat'

'ayāñ haiñ sab pe aur rakhte nahīñ haiñ koī raaz apnā

na hum apne na wo apne na dil apna na raaz apna

man-o-tu ke jahan mein hai yahi bas imtiyaz apna

zaban un ki hai zikr un ka KHayal un ka hai yaad un ki

na harf-e-naghma apna hai na koi tar-e-saz apna

do ek be-rang aansu hain do ek be-rabt baaten hain

na rudad apni tulani na afsana daraaz apna

nahin ma'lum ki kaun aaega kab aaega lekin

dar-e-dida bhi wa hai aur dar-e-dil bhi hai baz apna

gham-e-jaan maya-e-rahmat gham-e-jaan daulat-e-taskin

yahi kuchh kaenat apni yahi kuchh barg-o-saz apna

bi-hamdillah apni chashm-e-tar hai ba-wazu daim

bi-hamdillah dil har dam hai masruf-e-namaz apna

dil apna saf hai manind-e-mah-e-zau-fishan 'fitrat'

'ayan hain sab pe aur rakhte nahin hain koi raaz apna