na hum rahe na wo KHwabon ki zindagi hi rahi

na ham rahe na vo ḳhvāboñ kī zindagī hī rahī

gumāñ gumāñ sī mahak ḳhud ko DhūñDhtī hī rahī

ajab tarah ruḳh-e-ā.indagī kā rañg uḌā

dayār-e-zāt meñ az-ḳhud guzashtagī hī rahī

harīm-e-shauq kā aalam batā.eñ kyā tum ko

harīm-e-shauq meñ bas shauq kī kamī hī rahī

pas-e-nigāh-e-taġhāful thī ik nigāh ki thī

jo dil ke chehara-e-hasrat kī tāzgī hī rahī

ajiib ā.īna-e-partav-e-tamannā thā

thī us meñ ek udāsī ki jo sajī hī rahī

badal gayā sabhī kuchh us dayār-e-būdash meñ

galī thī jo tirī jaañ vo tirī galī hī rahī

tamām dil ke mohalle ujaḌ chuke the magar

bahut dinoñ to hañsī hī rahī ḳhushī hī rahī

vo dāstān tumheñ ab bhī yaad hai ki nahīñ

jo ḳhuun thūkne vāloñ kī be-hisī hī rahī

sunā.ūñ maiñ kise afsāna-e-ḳhyāl-e-malāl

tirī kamī hī rahī aur mirī kamī hī rahī

na hum rahe na wo KHwabon ki zindagi hi rahi

guman guman si mahak KHud ko DhunDhti hi rahi

ajab tarah ruKH-e-aindagi ka rang uDa

dayar-e-zat mein az-KHud guzashtagi hi rahi

harim-e-shauq ka aalam bataen kya tum ko

harim-e-shauq mein bas shauq ki kami hi rahi

pas-e-nigah-e-taghaful thi ek nigah ki thi

jo dil ke chehara-e-hasrat ki tazgi hi rahi

ajib aaina-e-partaw-e-tamanna tha

thi us mein ek udasi ki jo saji hi rahi

badal gaya sabhi kuchh us dayar-e-budash mein

gali thi jo teri jaan wo teri gali hi rahi

tamam dil ke mohalle ujaD chuke the magar

bahut dinon to hansi hi rahi KHushi hi rahi

wo dastan tumhein ab bhi yaad hai ki nahin

jo KHun thukne walon ki be-hisi hi rahi

sunaun main kise afsana-e-KHyal-e-malal

teri kami hi rahi aur meri kami hi rahi