na haram ki mujhko hai justuju na to rahguzar ki talash hai

na haram kī mujh ko hai justujū na to rahguzar kī talāsh hai

jahāñ sar jhukā ke mile sukūñ usī sang-e-dar kī talāsh hai

mujhe bhejnā hai payām-e-dil magar ek shart bhī hai mirī

jo ye raaz raaz hī rakh sake usī nāma-bar kī talāsh hai

jo tū ban sake mirā aasrā to ye hogā mujh pe karam tirā

mujhe shāh-rāh-e-hayāt meñ kisī ham-safar kī talāsh hai

mile aisā bāda-e-sarḳhushī jo na ḳhatm ho kabhī be-ḳhudī

jo sañvār de merī zindagī usī ik nazar kī talāsh hai

yahī zindagī kī adā bhī hai mirī kā.enāt-e-vafā bhī hai

tire ġham pe naaz hai is liye ki ye umr bhar kī talāsh hai

na davā duā se ġharaz mujhe na to jām-o-mai kī talab mujhe

jo ilāj-e-dard-e-jigar kare usī chārāgar kī talāsh hai

koī kah de 'aḳhtar'-e-nā-tavāñ ki qafas meñ hai mirā āshiyāñ

jo chamak rahī haiñ ye bijliyāñ unheñ mere ghar kī talāsh hai

na haram ki mujh ko hai justuju na to rahguzar ki talash hai

jahan sar jhuka ke mile sukun usi sang-e-dar ki talash hai

mujhe bhejna hai payam-e-dil magar ek shart bhi hai meri

jo ye raaz raaz hi rakh sake usi nama-bar ki talash hai

jo tu ban sake mera aasra to ye hoga mujh pe karam tera

mujhe shah-rah-e-hayat mein kisi ham-safar ki talash hai

mile aisa baada-e-sarKHushi jo na KHatm ho kabhi be-KHudi

jo sanwar de meri zindagi usi ek nazar ki talash hai

yahi zindagi ki ada bhi hai meri kaenat-e-wafa bhi hai

tere gham pe naz hai is liye ki ye umr bhar ki talash hai

na dawa dua se gharaz mujhe na to jam-o-mai ki talab mujhe

jo ilaj-e-dard-e-jigar kare usi chaaragar ki talash hai

koi kah de 'aKHtar'-e-na-tawan ki qafas mein hai mera aashiyan

jo chamak rahi hain ye bijliyan unhen mere ghar ki talash hai